Inatsisissatut siunnersuut ernumanartoq: Inissaaleqineq annerulersinnaavoq
![](/sites/default/files/styles/image_934x467/public/article_images/nuuk_byggeri630.jpg?h=4dc95ea7&itok=BMo-Qfwj)
Suliassinneqartartut suliffeqarfiillu namminersortut inissianik namminneq attartortillugit iluanaarutissaminnik sanaartornissaminnut pisortanit taarsigassarsisinnaajunnaassapput.
Naalakkersuisut inissianut aningaasaliisarnermut inatsimmut allannguuteqarnikkut inuinnaat amerlanerusut aningaasanik attartornikkut namminneq inissaminnik sanaartorsinnaalersinniarpaat.
Tamatuma saniatigut sanaartortut pisortanit attartornikkut inissialiat atorneqarsinnaalerlutik piareernerannit qaammatit arfinillit qaangiutsinnagit tunisassagaat piumasaqaataassaaq.
Siunnersuut Inatsisartuni ippassaq oqallisigineqarpoq.
AAMMA ATUARUK Naalakkersuisut inissianut attartortittakkanut pisortat taarsigassarsititsisarnerat unitsinniaraat
Tamannali inissarsiortunut eqquisinnaavoq taakkununngalu akisoorujussuusinnaalluni.
Sulisitsisut taama isumaqarput. Sulisitsisut sanaartornermik suliffeqarfiit allallu inissialiortut sinniisuuffigaat. Sulisitsisut oqarnerat naapertorlugu inatsimmut allannguuteqarneq inissianik nutaanik sanaartortoqannginnerulerneranut akillu - pingaartumik Nuummi qaffannerannik kinguneqarsinnaavoq.
Naalakkersuisut inatsisimmut allannguutissatut siunnersuutaat
Nutaanik inissialiornissamut pisortat taarsigassarsiarititaat siunissami taamaallaat inunnut taarsigassarsiaritinneqartalissasut, tassa suliffeqarfinnuunngitsoq siunnersuutigineqarpoq.
Inissialiornissamut pisortanit taarsigassarsillutik ataatsimik inissiaateqareersut, nutaanik inissialiornissamut pisortanit taarsigassarsiteqqinneqarsinnaassanngillat imaluunniit nutaanik inissialiornissamut pisortanit taarsigassarsilluni inissialiaareersumik suli taarserneqanngitsumik tigusisinnaassanngillat.
Sanatitsisut namminersortut nutaanik inissialiornissamut taarsigassarsitinneqarnissamut neriorsuummik suli pisinnaassasut. Inissialiat nutaat taakkua atuilernissamut akuersissutip tunniunneqareernerata kingorna kingusinnerpaamik qaammatit arfinillit qaangiunneranni inunnut tunineqarsimassasut, taarsigassarsititsinissamut neriorsuutip tunniunneqrnerani piumasaqataassaaq. Tamatuma kingorna inissianut tunineqarsimanngitsunut taarsigassarsititsinissamut neriorsuut atorunnaassaaq.
Inatsit maanna atuuttoq 2027-mi atorunnaariartortussaavoq.
Najoqqutaq: Naalakkersuisut siunnersuummut oqaaseqaataat
Taamaammat Naalakkersuisut siunnersuut taamaatiinnassagaat Sulisitsisunit kaammattuutigineqartoq, Sulisitsisut allattoqarfiani pisortaq, Karsten-Lyberth Klausen oqarpoq.
- Inissianik sanaartornernut sunniuteqarlunilu ikiartortitsinissaa ernummatigaarpoq. Akit inissianik piumasaqartoqarnerata kingunerisaanik qaffaratarsinnaapput. Taamaalilluni innuttaasut nalinginnaasut eqqugaasinnaallutik, Karsten-Lyberth Klausen oqarpoq.
Taassuma inatsit 2027-mi atorunnaariartortussaareersoq annerpaamillu ukiuni tulliuttuni marlunnit pingasunut sunniuteqassasoq ilanngullugu oqaatigaa. Taamaammat Naalakkersuisut maannakkut allannguiniarnerat paasisinnaanngilaa.
Nuummi ineriartornerup appariartornissaa ernummatigigaa
Nuummi kommunimit aamma ernumangaatsiartoqarpoq. Illoqarfiup pingaarnersaannut noorartorpassuit angerlarsimaffeqanngitsullu inissaqartinniarnissaat piffissami sivisuumi unammillernartinneqarpoq.
Kommuneqarfik Sermersuumi borgmesterip, Charlotte Ludvigsenip (IA) amerlanerusut namminneq ineqalernissaat kissaatigalugu erseqqissaatigaa. Taamaakkaluartorli inissaqassutsip annikillinissaa kingunerluuteqarsinnaanerarpaa.
- Inatsimmut allannguuteqarnissanik amigaateqarnitsinnut inissarsiortutullu allattorsimaffitsinnut suli unammillernarnerulissaaq. Sanaartornermi suliniuterpassuit aallartinneqarsimasut piviusunngunngitsooratarsinnaapput, tamannalu ajuusaarnartorujussuussaaq. Nuummi ineriartornermut uniffiliisinnaanera ernummatigaara, borgmesteri KNR-imut oqarpoq.
Nuummi ISERIT aqqutigalugu inissarsiortutut allattorsimaffimmiittut maanna ukiuni aqqanilinni utaqqisartutut missiliorneqarpoq.
Aarlerinarnera annertussasoq
Nunatsinni kommunini tallimaasunit sisamanut inissiat 227-t sanaartornissaannut 58.267.433 millionit koruunit Naalakkersuisunit 2019-imi taarsigassarsiassanngortinneqarput.
Taarsigassanngortinneqartunit millionippassuarnik annerpaartaat sanaartortunut taarsigassianngortitaapput. Kommuneqarfik Sermersuumi inissianut taarsigassanngortitsinermut 30 millionit koruunit ukioq manna missingersuutigineqarput.
Taakkunannga 3-4 millionillu akornanniittut inuinnarnit qinnutigineqarnissaat naatsorsuutigineqarput, sinnerilu sanaartortunut atorneqassallutik.
Naalakkersuisut tusarniaanermut akissuteqarnerminni sanaartortut nutaamik sanaartornissaminnut suli periarfissaqassasut tunngavilersuutigaat, inissiammi tunineqaqqittussaassammata. Tamannali inissialiortiterniarnermut ingerlatitsiinnarnissamut naammannavianngitsoq Sulisitsisut ernumassutigaat.
- Inissiat sanaartukkat qaammatit arfinilinngortinnagit tunisinnaanissaata aarlerinarnera annertoorujussuussaaq. Siunnersuutip atorunnaarsinneqarnissaa Sulisitsisunit kissaatigaarput. Taamaanngippat piffissaliussap qaammatinut 18-inut 24-nulluunniit sivitsorneqarnissaa innersuussutigaarput, taamaalillutik inissianik tunisaqarsinnaassammata, Karsten-Lyberth Klausen oqarpoq.
Sulisitsisut inatsisissatut siunnersuut pillugu Inatsisartut ineqarnermut ataatsimiititaliaata ataatsimeeqatiginissaa qinnutigaat.