Naalakkersuisut inissianut attartortittakkanut pisortat taarsigassarsititsisarnerat unitsinniaraat
Nunatsinni sanaartortoqarpoq. Pingaartumik Nuummi inuit amerlanerusut illoqarfiit pingaarnersaannut noorarneranni kivittaatit sanaartorfiillu ingerlalluarput.
Namminersorlutik Oqartussalli taarsigassarsiortortoqaraluttuinnarnera maluginiarpaat. Sanaartortut namminersortut aningaasaliisartullu inissianik amerlanerusunik pisortanit taarsigassarsinikkut aningaasaleeqataaffigineqartunik sanaartortarput. Tamanna innuttaasut amerlanerusut namminneq ineqalernissaannut ikiorsiisussamik 2002-mi inissialiornermut aningaasaliisarnermut inatsiseqalernermat periarfissaalerpoq,
Sanatitsisorpassuit inissiat sanaartorlugit naammassineqartut attartortillugit ineqarnermut akiliummit namminneq aalajangersinnaasaminnit iluanaaruteqartarput. Naalakkersuisulli tamanna inatsimmi siunertaannigsoq isumaqarput.
Nunatsinni kommunini tallimaasunit sisamanut inissiat 227-t sanaartornissaannut 58.267.433 millionit koruunit Naalakkersuisunit 2019-imi taarsigassarsiassanngortinneqarput. 2018-imi taarsigassiassanngortitat ilanngukkaanni ukiut marluk ingerlaneranni 69 millionit koruunit taarsigassanngortinneqarput.
Naalakkersuisut inatsisimmut allannguutissatut siunnersuutaat
Nutaanik inissialiornissamut pisortat taarsigassarsiarititaat siunissami taamaallaat inunnut taarsigassarsiaritinneqartalissasut, tassa suliffeqarfinnuunngitsoq siunnersuutigineqarpoq.
Inissialiornissamut pisortanit taarsigassarsillutik ataatsimik inissiaateqareersut, nutaanik inissialiornissamut pisortanit taarsigassarsiteqqinneqarsinnaassanngillat imaluunniit nutaanik inissialiornissamut pisortanit taarsigassarsilluni inissialiaareersumik suli taarserneqanngitsumik tigusisinnaassanngillat.
Sanatitsisut namminersortut nutaanik inissialiornissamut taarsigassarsitinneqarnissamut neriorsuummik suli pisinnaassasut. Inissialiat nutaat taakkua atuilernissamut akuersissutip tunniunneqareernerata kingorna kingusinnerpaamik qaammatit arfinillit qaangiunneranni inunnut tunineqarsimassasut, taarsigassarsititsinissamut neriorsuutip tunniunneqrnerani piumasaqataassaaq. Tamatuma kingorna inissianut tunineqarsimanngitsunut taarsigassarsititsinissamut neriorsuut atorunnaassaaq.
Inatsit maanna atuuttoq 2027-mi atorunnaariartortussaavoq.
Najoqqutaq: Naalakkersuisut siunnersuummut oqaaseqaataat
Sanaartortitsisut aningaasaliisartulluunniit suliffeqarfiinut aningaasat qanoq amerlatigisut taarsigassanngortinneqarsimanersut oqaatigineqanngilaq.
Taamaakkaluartoq Naalakkersuisut allannguiniarput. Taamaammat ineqarnermut attaveqatigiinnermullu Naalakkersuisup, Karl Frederik Danielsenip (Siumut) inatsimmut allannguutissatut siunnersuut ukioq manna ukiakkut ataatsimiinnermi oqallisigineqartussaq saqqummiuppaa.
Tamanna aaqqissuussinerup amerlasuunut sunniuteqarluarnerunissaanik qulakkeerutaassasoq, Naalakkersuisut oqaatigaat.
Siunnersuut tunuarteqqugaa
Inatsimmulli allannguutissaq tamanit isumatsialaasorineqanngilaq. Sulisitsisut siunnersuutip tunuartinneqarnissaa tusarniaanermi akissumminni innersuussutigaat.
Sulisitsisut aaqqissuussineq maannakkut atuuttoq pissutigalugu inissianik tulluartunik akilinnik pitsaasunillu ataavartumik pilersuisoqarsoraat.
Tamanna pisariaqarsimallunilu pisariaqarluinnarsimavoq, pingaartumik Nuummi, inatsimmillu allannguineq inissialiornerujussuarmut unitsitsisinnaasoq, tusarniaanermi akissummi allassimavoq.
Naalakkersuisut inatsimmik allannguinermi sunniutissamik naliliinerminni allapput:
”Siunnersuutip inissiarsuarnik amerlasoorpassuarnik inissiartaqartunik nutaanik sanaartorneq unikaallatsissagaa ilimanarpoq.”
Kommuneqarfik Sermersuumi ernumasut
Nunatsinni aningaaseriviit marluk aamma oqaaseqarput.
Grønlandsbankenip inatsimmmut allannguut inissiamik piginnittunut namminersortunut nalinginnaasunut ineqalerusuttunut kingunerinnaasai pillugit nangaavoq.
Banknordikip inissianik nutaanik sanaartornerup unikaallatsinneqarnera suliffissanik akileraarutitigullu isertitanut ikinnerulersitseratarsinnaanera oqaatigaa.
Inissianik sanaartornerup unikaallatsinneqarsinnaanera Kommuneqarfik Sermersuup ernumassutigaa. Taarsigassarsisinnaanermut periarfissanut killilersuineq inissianillu tunisaqarnissamut piumasaqaateqarneq pissutigalugu sanaartornermik suliaqartut namminersortut inissianik quleriaanut aningaasaliinissamut kajumissuseerunnerannik kinguneqarsinnaasoq, kommune tusarniaanermi akissummi allappoq.
Kommuneqarfik Sermersuup akissutaa naapertorlugu Nuummi inissaaleqinermut atatillugu unammillernartoqangaatsialersinnaavoq.
Naalakkersuisut akissuteqarnerminni allapput:
“ Naalakkersuisut kissaatigaat, aningaasalersuinissami pisortat periarfissiissutaat iluaqutaasinnaaffiini naleqquttumik iluaqutaasinnaanngorlugit, innuttaasut imminnut inissianik pilersorsinnaasut sapinngisamik amerlanerpaat periarfissanik piusunik atorluaassasut. Entreprenørit annerit tunisinissaq siunertaralugu inissianik suli sanaartorsinnaanissaat, ilutigalugu suli periarfissaassaaq.
Siunnersuut Inatsisartunit oktobarip ulluisa arfineq-aappaanni oqallisigineqassaaq.