Pinerlisat ilisimannittullu eqqartuussinerni illersugaanerunissaat inatsisissatut siunnersuutaasoq
Pinerlisat ilisimannittulluunniit eqqartuussinerni navianalersinnaasumiittarput.
Pinerlisat eqqartuussinerni pisinnaatitaaffeqarnerulernissaat ilisimannittullu illersugaanerulernissaat, Naalakkersuisut inatsisissatut siunnersuuteqarnermikkut kissaatigaat.
Naalakkersuisut inatsisissatut siunnersuutaat kinguaassiuutitigut atornerluineq akiorniarlugu periusissiaminnut, uiggiuppaat. Pinerlisat eqqartuussinerni pisinnaatitaaffeqarnerulernissaat periusissiaminni ukkataavoq.
- Pinerlisanut ikiuukkusuttugut Killiliisami allaqqavoq, taamaammat tamanna nunatsinni eqqartuussisarnermi inatsimmi allaqqanissaa pingaaruteqarpoq, Martha Abelsen oqarpoq.
Kinguaassiuutitigut atornerluinermik akiuineq Killiliisami ukkataagaluartoq, pinerlisat eqqartuussinernilu tamani ilisimannittut inatsisissatut siunnersuummi pineqarput.
Ilitsersuineq illersuinerlu pitsaanerusut
Inatsisissatut siunnersuummi immikkoortut pingaarnerit:
- Ilitsersuineq naammagittaalliorsinnaanerlu.
- Pinerlisamut ikiuuttussamik toqqaaneq.
- Pinerlisap eqqartuussinerni najuussinnaanera.
- Anisoqassatillugu iperagaasoqassatillugulu kalerriineq.
- Ilisimannittunik nassuiaateqarneranni illersuineq.
Politiit pinerlisanut pinerlisanulluunniit qanigisaasunut eqqartuussinerni pisinnaatitaaffiinik pisussaaffiinilluunniit ilitsersuisussaatitaapput.
Eqqartuussivillu pinerlisamut ikiorfartuisussamik toqqaasussaatitaavoq.
Inatsisissatullu siunnersuut akuerineqassappat, unnerluussaq pisuutitaanngikkaluarpalluunniit pinerlisaq taarsiivigineqarnissamik periarfissaqalissaaq. Taartisiassat 3.500 koruuninit ikinnerugaangata tunniukkasuarneqartalissapput.
Imaanngilarmi pinerlisaq unnerluussaq eqqartuussaareeraangat qaangiisartoq. Taamaammat inatsisissatut siunnersuut akuerineqassappat, pinerluttoq iperagaasussanngorpat imaluunniit tv-kkut radiokkulluunniit aallakaatitassiami peqataasussanngorpat allaatigisamiluunniit ilanngunneqartussanngorpat pinerlisap tamanna pillugu kalerrinneqarnissaanik periarfissaqarnerulersitsissaaq.
Tamanna suliani sakkortuumik soorlu nakuusernermik, sioorasaarinermik, kinguaassiuutitigut atornerluinermik inuunermilluunniit navianartorsiortitsinermik pinerluuteqarsimanermut tunngasuni pisinnaasassaaq. Kinali pinerlisamut kalerriisassanersoq erseqqissarneqanngilaq.
AAMMA ATUARUK Kalaallit Nunaanni politeeqarnerup oqaluttuarisaanerani aaqqissuusseqqinnerit annertunersaat piariingajalersoq
Inatsisissatut siunnersuut akuerineqassappat, ilisimannittut eqqartuussivimmut nassuiaajartornissamik siooqqateqaqqunagit inuit aalajangersimasut eqqartuussinermi peqataanissaannik itigartitsisiinnaatitaalissaaq, ilisimannittup ilumoortumik nassuiaanissaanut iluaqutaassasoq nalilerpagu.
Ilisimannittullu eqqartuussinermi qajassuunneqarnissaa pisariaqarpat, politiit tamanna eqqartuussivimmut pinngitsooratik kalerriutigissavaat.
Inatsisissatut siunnersuut partiinit tamanit taperserneqartoq, Inatsisartuni novemberip ulluisa 24-anni siullermeerneqassaaq.
