Kalaallit Nunaanni politeeqarnerup oqaluttuarisaanerani aaqqissuusseqqinnerit annertunersaat piariingajalersoq
Kalaallit Nunaanni politiit atugaat nutarterneqassapput, taamaaliortoqassarlu Naalakkersuisut oqarnerat naapertorlugu, Kalaallit Nunaanni politiinut unnerluussisussaatitaasunullu atugassarititaasut pillugit aatsaat taamak annertutigisumik piffissami nutaajunerusuni aaqqissuusseqqittoqassalluni.
Siunnersuut danskit naalakkersuisuisa siunnersuutigaat, taannalu naalagaaffeqatigiinni tamani politiit isumaqatigiissuteqarnissaanut annertuumut 2021-mit 2024-mut atuuttussamut siunnersuutaalluni,.
Kalaalli Nunaanni politiinni aaqqissussseqqinneq, aallaaveqarpoq Danmarkimi allannguutit 2007-mi naammaassineqartut.
Kalaallit Nunaanni politiit naalagaaffeqatigiinnilu politiit atugaat assigiinnerulissaaq
- Kisiat suleqatigiit ukua iluminni atukkamikkut assigiinnerulersumik atugaqalernerisigut , ulluinnarni ingerlanerat aamma naalagaaffeqatigiinnerup iluani ataatsimoortumik suleqatiminnut qanillattornerusuik atugassaqartinneqarnerannut pitsanngorsaataaneruvoq, Inatsisinut atuuttitsinermut Naalakkersuisoq Martha Abelsen taama oqarpoq.
Innutaasunik pitsaanerusumik attaveqarneq
Aaqqissuusseqqinnerup siunertaasa ilagaat, politiit najukkanilu innuttaasut
attaveqatigiittarnerisa patajaallisarneqarnissaat siunertarineqarpoq, nunap immikkoortuini siunnersuisoqatigiinnik pilersitsinikkut.
Taamaalilluni Kalaallit Nunaanni Politiit pisortaanerat, Isumaginninnermut aamma Inatsisinut atuuttitsinermut naalakkersuisoq borgmesterillu ataatsimut soqutigisatik pillugit apeqqutit oqaloqatigiissutigisinnaalissavaat.
Nutarterinerup immikkoortuata aapaani Politiit pillugit Naammagittaalliuuteqartarfik Arlaannaannulluunniit Attuumassuteqanngitsoq pineqarpoq taassani siunissami Kalaallit Nunaanni politiini sulisut sulitillutik pissusilersortarnerat pinerluutigisimasaallu pillugit misissuisarnissaa aalajangiisarnissaalu siunnersuutip kingunerissavaa.
Siusinnerusukkut najukkani politiinut naammagittaalliorfeqaraluarpoq, politimesterillu suliassaralugu, kisianni Naammagittaalliuuteqartarfik Arlaannaannulluunniit Attuumassuteqanngitsup suliassaq tigussavaa, taamaalilluni arlaannaannulluuniit attumaasuteqanngitsunit misissuisarneq qulakkeerneqassalluni, Naalakkersuisut taama allappput.
Danmarkimi politeqarfinni atukkat assigilissavaat
Najukkani siunnersuisoqatigiit aamma oqartussani nammagittaalliorfeqalernikkut, politiit aaqqissorneqarnerisa unnerluussisussaatitaassullu tunngaviusumik allannguisoqarnikkut aaqqissuusseqinnermi malitseqassapput.
Aaqqissuusseqqinnermi Kalaallit Nunaani politiit Danskit politiivisa aaqqissuussanerattut naligiilissapput
- Politiit atukkamikkut pitsanngorsaavigineqarnerata kingunerissavaa sulinerminni aamma toqqaannarnerusumik sullissisalernissaat, Martha Abelsen oqarpoq.
Inatsisissatut siunnersuumut partiit tamarmik tapersersuipput, siunnersuullu novemberip ulluisa 24-anni akuersissutigineqarnissaa naatsorsuutigineqarpoq.
