Paasitinneqarsinnaatitaaneq pillugu inatsit Inatsisip kinguartinneqarnissaa Venstrep piareersimaffigaa
Pisortat ingerlatsinerat pillugu paasitinneqarsinnaatitaaneq pillugu danskit inatsisaata naalagaaffimmi oqartussanut Nunatsinniittunut atortuulersinneqarnissaanik siunnersuutip maannakkutut iluseqartillugu Danmarkip Nunatsinni Savalimmiunilu oqartussaaffigisaanut atuuttussanngortinneqarnissaata kinguartinneqarnissaa, partiip naalakkersuisuutitaqartup Venstrep piareersimaffigaa.
Nunat taama kissaateqarpata taamaaliortoqarsinnaavoq. Partiip pisortat ingerlatsinerat pillugu paasitinneqarsinnaatitaaneq pillugu oqaaseqartartua, Jan E. Jørgensen, KNR-imut taama oqarpoq.
- Uanga ajoriffissaqartinngilara.
AAMMA ATUARUK Inatsisissaq Naalakkersuisut isumaqatigiinngissutigigaat
Inatsit naalakkersuisuni isumaqatigiinngissutaasoq
Inatsisissatut siunnersuutip ullumikkutut iluseqartillugu Inatsisartuni saqqummiunneqarnissaa danskit inatsisinik atuutsitsinermut ministereqarfiata KNR-imut mailikkut uppernarsaraluarpaa.
Inatsisip ilaata, ministerit allagaataannik paasitinneqarsinnaatitaanermut tunngasup oqilisinnissaa, Folketingimi isumaqatigiinniutigineqartussaagaluartoq tamanna ilisimatitsissutigineqarpoq.
Danmarkimi naalakkersuisooqatigiinnissamik tunngavissami tamanna siunertarineqarpoq, inatsisinilli atuutsitsinermut ministereqarfiup pilersaarutini allanngortinngilai.
"Inatsisinik atuutitsinermut ministereqarfik isumaqanngilaq pisortat ingerlatsinerat pillugu paasitinneqarsinnaatitaaneq pillugu inatsisip atuuttup atortuulersinneqarnissaanut inatsimmut allannguutissat pillugit isumaqatigiinniarnerit utaqqineqartariaqartut," inatsisinik atuutsitsinermut ministereqarfik KNR-imut mailikkut taama allappoq.
Venstre 'suliamut pineqartumut nukinnik atuerpiarsimanngitsoq', Jan E. Jørgensenip nassuerutigaa. Allaammi oqaaseqartartup KNR-imit attaveqarfigineqarami suliaq aatsaat tusagaqarfigaa.
Danskit ministeriisa akissussaaffigisaannut, aamma Kalaallit Nunaannut Savalimmiunullu tunngatillugu, pisortat ingerlatsinerat pillugu paasitinneqarsinnaatitaaneq pillugu inatsisip taannaaginnarnissaa 'pissusissamisuussasoq' oqaaseqartartoq isumaqarpoq.
Pisortalli ingerlatsinerat pillugu paasitinneqarsinnaatitaaneq pillugu inatsimmut allannguutissat Danmarkimi piareerneqarnissaat utaqqissunneqarsinnaavoq - Namminersorlutik Oqartussat kinguartitsisoqarnissaanik kissaateqarlutik saaffiginnissuteqassagaluarpata.
- Kingornatigummi aaqqiissuteqartoqarsinnaavoq. Namminersorlutilli Oqartussat Naalakkersuisullu kissaateqassappata (inatsisissatut siunnersuutip kinguartinneqarnissaanik, aaqq.) taava tamanna misissorumaarparput, Jan E. Jørgensen taama oqarpoq.
Inatsit naalakkersuisuni isumaqatigiinngissutaasoq
Inuit Ataqatigiit naalakkersuisuni partiini kisiartaallutik pisortat ingerlatsinerat pillugu paasitinneqarsinnaatitaaneq pillugu danskit inatsisaannut akuerliullutik oqaaseqarsimapput. Inatsilli 2013-imi atuutilersinneqarmalli Danmarkimi aamma partiit naalakkersuisuutitaqartut akornanni avissaaruussutaasarsimavoq.
Inatsit Venstremit illersorneqarpoq, De Konservativellu siulittaasuata - maanna inatsisinik atuutsitsinermut ministeriusup - Søren Pape Poulsenip inatsisip allanngortinneqarnissaa piumasaqaatigisimavaa.
Inatsit maanna atuuttoq Liberal Alliancep 2012-imi itigartitsissutigaa. Partiillu politikkikkut oqaaseqartartuata, Christine Egelundip aviisimut Jyllands-Postenimut apriilip qaammataani oqaatigaa ministereqarfinni ammanerusumik ingerlatsisoqartariaqartoq.
Taanna aamma Liberal Alliancep Kalaallit Nunaannut tunngasunut oqaaseqartartua, Carsten Bach, Liberal Alliance inatsisip Nunatsinni sulianut tunngatillugu atuuttunngortinneqannginnissaanik isumaqarnersoq, oqaaseqartissinnaasimanngilagut.
Carsten Bachilli KNR-imut sms-ikkut naatsumik ilisimatitsissutigaa inatsisissatut siunnersuutip Kalaallit Nunaannut tunngatillugu saqqummiunneqarsimanera 'ilisimasaqarfigisimanagu'.
