Immikkut ilisimasalik: Nunani avannarlerni paasisaqarsinnaatitaanermut inatsit matoqqanerpaaq
Ilisimatuup nunatsinnut tunngasuni suliani danskit kalaallillu naalakkersuisuisa kissaatigisaattut inatsisip atuutilernissaa maanna mianersoqqussutigaa.
Danskit paasisaqarsinnaatitaaneq pillugu inatsisaat Finlandimi, Sverigemi Norgemilu inatsisinit assingusunit matoqqaneruvoq.
Danmarkimi inatseqarnermut ministereqarfiup nalunaarusiarititaani taama allassimavoq.
Kisianni ministereqarfiup taassuma inatsit Danmarkip akisussaaffigisaani sulianut Nunatsinnut tunngasunut, assersuutigalugu nunanut allanut illersornissamullu tunngasuni, atuutilersikkusuppaa, nunatsinni naalakkersuisut tapersigaanik.
Ilisimatooq: Kalaallit Nunaanni matoqqanerulerneq
Tamannali Danmarkimi pisortat ingerlatsinerat pillugu ataatsimiititaliami 2002-miit 2009-mut ilaasortaasimasup tusagassiutillu pillugit inatsisilerituup Oluf Jørgensenip kingunerlussanerarpaa.
- Inatsimmik nutaamik Kalaallit Nunaanni danskit suli oqartussaaffigisaanni atuutilersitsineq tamanut ammasumik ingerlatsinermik annikilliissaaq. Tamanna qularnanngilaq, Jørgensen oqarpoq
AAMMA ATUARUK Kielsenip inatsisissatut siunnersuut tunuartikkaa
Danskit paasisaqarsinnaatitaanermut inatsisaat 2013-meersoq atorlugu danskit ministereqarfiisa assersuutigalugu folketingimi ilaasortap ministerillu akornanni allaqatigiissutigisanik takunnikkumasut itigartikkuminarnerupput.
Tassani politikerit isumassarsianik assersuutigalugu Folketingimi saqqummiunneqannginneranni eqqartueqqaarnissamut periarfissaqarnissaat tunngavilersuutaavoq.
- Eqqarsaatit sms-illu politikerit allat paarlaasseqatigiiffigalugit isumassarsiaat misiligaqaarneqqaarsinnaasariaqarput (…) isumaqatigiinniarnissallu piareersarneqarsinnaallutik, tamanullu saqqummiuttariaqanngitsumik ministeri pilersaarusiornissamut isumalioqatigineqarsinnaalluni.
Malittarisassarli taanna innuttaasut suliamik aallajangersimasumik itinerusumik paasisaqanginnissaanut tunngavilersuutigineqakulaqaaaq, paasinikkumasumut itigartitsissut tunngavilersorneqarani.
Inatsisilerituullu suliani nunatsinnut tunngasuni aamma taamaattoqassanerarpaa.
- Danskit ministereqarfiini allagaateqassaaq, soorlu Kalaallit Nunaannut kingunerusussanik ilisimasallit naliliinerannik ilaqartunik, tamanulli takusassaasunut ilaatinneqarunnaarsinneqartunik. AAMMA ATUARUK Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa
AAMMA ATUARUK Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa
Danskit amerlanerussuteqartut allannguerusuttut
Folketingimi amerlanerussuteqartut naalakkersuisullu ukiuni kingullerni isornartorsiuisareernerisigut, inatsit allanngorniarneqalerpoq. Taamaammat Danmarkimiit siunnersuut Inatsisartut itigartissagaat inatsisileritooq kaammattuivoq.
- Kalaallit Nunaata Inatsiseqarnermut ministereqarfik utaqqeqquniarliuk. Danmarkimi paasitinneqarsinnaatitaaneq pillugu inatsit aappaagu qanoq ittuulissanersoq ilisimatinnagu Kalaallit Nunaanniit innersuussuteqarsinnaanngillat.
- Maanna allannguinissaq ilumoorussinerunngilaq, Oluf Jørgensen oqarpoq.
Danskit akisussaaffigisaanni danskit paasisaqarsinnaatitaanermut inatsisaata nunatsinni atuutilernissaanik siunnersuut Inatsisartut marlunngorpat oqaluuserissavaat.
AAMMA ATUARUK KNR tusarniaasoqarmat akinngitsoortoq