Danskit inatsisaata eqqunniarneqarnera GE-p isornartorsioraa

Pisortat ingerlatsinerat pillugu paasitinneqarsinnaatitaaneq pillugu danskit inatsisaata naalagaaffimmi oqartussanut Nunatsinniittunut atortuulersinneqarnissaanik danskit inatsisinik atortitsinermut ministereqarfiata kissaateqarnera sulisitsisut peqatigiiffiata GE-p isornartorsiorpaa.
Assi © : Nils Baum/Bureau for Inatsisartut
februaarip 08-at 2017 09:26
Nutserisoq Simon Uldum -

Sulisitsisut Namminersorlutik Oqartussanut tusarniaanermi akissuteqarlutik erseqqissaatigaat, pisortat ingerlatsinerat pillugu paasitinneqarsinnaatitaaneq pillugu danskit inatsisaata Danmarkimi 2014-imi atortuulersinneqarnerata kingorna, danskit oqartussaasuinut tunngatillugu ammanerusumik ingerlatsinermik kinguneqarsimanngitsoq.

Paarlattuanilli suliat arlallit avammut nalunaarutigeqqusaasimanngillat, taama isornartorsiuipput. Tamannalu tusagassiortup Jesper Tynellip ilaatigut atuakkiamini "Mørkelygten"-imi aamma ersersippaa.

Taamaammat sulisitsisut peqatigiiffiata GE¬-p siunnersuut tapersersorsinnaannginnerarpaa.

- Suliani Kalaallit Nunaannut tunngassuteqartuni malittarisassat taakku atuutsinneqarnissaasa akuersissutigineqarnissaat pinngitsoortinngikkaanni, suliat taakku Naalagaaffiup oqartussaasuinit avammut nalunaarutigeqqusaanngitsutut aalajangiiffigineqarartarsinnaapput, sulisitsisut peqatigiiffianni GE-mi inatsisitigut siunnersorti tusarniaanermut akissuteqaammi taama allappoq.

Pisortat ingerlatsinerat pillugu paasitinneqarsinnaatitaaneq pillugu danskit inatsisaata atortuulersinneqarnissaanik siunnersuut danskit Nunatsinni suli akisussaaffigisaata iluaniinnaq atuutissaaq. Susassaqarfinni Nunatta oqartussaaffigilersimasaani sulianut tunngatillugu Nunatsinni pisortat ingerlatsinerat pillugu paasitinneqarsinnaatitaaneq pillugu inatsit suli atuutissaaq.

Siunnersuutip Inatsisartut upernaakkut ataatsimiilerpata oqaluuserineqarnissaa naatsorsuutigineqarpoq.