Politikki TV Radio

KNR-ip pisortaa: Inatsisissaq tusarniaassutigineqartariaqaraluarpoq

Danskit oqartussaasuisa Nunatsinnut tunngasunik ingerlatsinerannut paasitinneqarsinnaatitaanermut malittarisassanut siunnersuut pillugu Naalakkersuisut tamanut ammasumik tusarniaatitsisimasariaqaraluarput. KNR-ip pisortaa Karl-Henrik Simonsen taama isumaqarpoq

Allattoq Helle Nørrelund Sørensen

oktobarip 03-at 2016 12:54

Nutserisoq Ivik Kristiansen

Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip 2013-imeersup danskit Nunatsinni oqartussaasuinut atuutsinneqalernissaanik siunnersuut Inatsisartunit sapaatit akunnerata siuliani siullermeerneqareersoq KNR-ip pisortaa isornartorsiuivoq.

Danskit inatsisinut atuutsitsinermut ministereqarfiata siunnersuut Danmarkimi tusarniaassutigaa, ilaatigut Namminersorlutik Oqartussat tusarniaaffigineqarlutik.

Aamma atuaruk Danskit inatsisaata atuutilersinneqarnissaa nunatsinni tusarniaassutigineqanngitsoq

Attuumassuteqartulli allat, soorlu Nunatsinni tusagassiuutit, peqatigiiffiit isumalioqatigiissitallu tusarniaaffigineqanngillat.

Tusarniaasoqarnissaalu Naalakkersuisut namminneerlutik isumagisariaqaraluaraat, Karl-Henrik Simonsen isumaqarpoq.

- Naalakkersuisut oqartussaasutut tassani akisussaaffeqartut isumaqarpunga. Inatsimmik allannguiniaraanni taava suliffeqarfiit kalluarneqartussat tusarniaaffigineqartariaqaraluarput. Taanna Naalakkersuisut pinngitsooratik akisussaaffigisussaavaat, Kalaallit Nunaanni naalakkersuisuugamik, Karl-Henrik Simonsen oqarpoq.

Siunnersuut Nunatsinni tusarniaassutigineqartinnagu Naalakkersuisut siulittaasuata naalakkersuisoqarfianit suliassanngortinneqarpoq.

Aamma atuaruk Eqqartuussissuserisut: Pisortat ingerlatsinerat pillugu paasitinneqarsinnaatitaaneq pillugu inatsisissaq kinguartilli

Matoqqanerusoq

Inatsit Nunatsinni oqartussaasut soorlu politiini pinerluttunillu isumaginnittoqarfimmi sulianut paasitinneqarsinnaatitaanermut pingaaruteqarpoq.

Pisortallu ingerlatsinerat pillugu paasitinneqarsinnaatitaaneq pillugu inatsisissaq nutaaq naalagaaffiup suliaata ilaannut tunngasunut pappilissanut takunnissinnaatitaanermut periarfissagissaarnerulersitsigaluartoq, ministerit suliaannut paasitinneqarsinnaanermut aamma sukaterineruvoq.

Tamannalu Karl-Henrik Simonsenip eqqarsarnartoqartippaa.

- Nunatsinni inatsisit assigiinnissaat uani pingaaruteqarluinnarpoq. Soorlu Naalakkersuisut suliarisimasaat pillugit massakkut apeqqutissaqaraangatta, suliallu ingerlaneranni allakkianik piumagaangatta, ammasorujussuarmik periarfissaqarpugut. Kisianni naalagaaffiup suliffeqarfiutaani Kalaallit Nunaannut tunngasunut apeqquteqassagutta allaanerungaatsiartumik matoqqanerungaatisiartumillu inatsiseqalissaaq. Taannalu eqqunngitsutut isigaara, KNR-ip pisortaa Karl-Henrik Simonsen oqarpoq.

Aamma atuaruk Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa

Tusagassiivimmi Sermitsiaq.AG-mi aaqqissuisuunerup, Poul Krarupip tusaaniaasoqannginnera aamma isornartorsiorpaa.

Nunatsinni tusarniaasoqannginnera "Tamat oqartussaaqataanerannut ilungersunartoq", Poul Krarup KNR-imut oqarpoq.