Qujaukitsoq: Inatsisartut taama suliakkiipput
- Taassami uanga nunanut allanut tunngasunut tatigisaallunga naalakkersuisut siulittaasuata inissinnikuuaannga, aamma piumaffigineqarnera naapertorlugu nassuiaateqarpunga, taannalu tusaatissatut tiguneqarpoq. Inatsisartut aamma ataatsimiititaliaat susassaqartuani nassuiaat tusaatissatut tigugaat, Vittus Qujaukitsoq sisamanngormat Qanoruumi oqarpoq.
Qujaukitsup nunanut allanut sillimaniarnermullu tunngasunut ataatsimiitsitaliamut nassuiaatimi, KNR-ip allakkanik takunnikkumanermigut aamma pissarsiaa, ilaa Qanoruumi uteqqippaa.
AAMMA ATUARUK Vittusip isornartorsiuinera Christiansborgimi tupigusuutigigaat
Tassanilu inatsisartuni aalajangiiffigisassatut siunnersuut ukiakkut ataatsimiinermi akuerineqartoq innersuussutigaa.
- Uani inatsisartut naalakkersuisunut suliakkiissutaat, amerikamiut nunatsinniinerata pillugu sakkutooqarfeqarnermi nunatta sunniuteqartumik aammalu aningaasatigut iluaquteqarnissaannik inatsisartuninngaanniik piumaffigineqarnerput tamakkiisumik eqquutsinniarlugu sulivunga, Vittus Qujaukitsoq oqarpoq.
AAMMA ATUARUK Kim Kielsenip Vittus Qujaukitsoq suli tatigigaa
Aalajangiiffigisassatut siunnersuummi allassimavoq, nunarput pissarsiaqanngippat amerikamiut sakkutuuisa nunatsinniinnissaat kissaatigineqannginnerannik isummerneq taperserneqassasoq Naalakkersuisut kissaatigigaat.
Taamaammat Naalakkersuisuit Pituffimmi kiffartuussinissamik isumaqartigiissutip annaanerata malitsigisaanik nutaamik isumaqatigiissusiorniarsarinerminni Danmarkimut tatisiniarsaripput.
- Kissaatigut piumasaqaatigullu danskiniit tusaaneqanngippata taava naalagaaffeqatigiinnermut arlaatigut ilungersunartorujussuarmik killiffeqarsimassooq. Taamaattumik neriuppunga ullumikkut oqariartuutigisagut naalaarluarneqartut, Vittus Qujaukitsoq oqarpoq.
