Imminut toqoriarnerit amerleriarsimasut
Siorna imminut toquttut 41-upput 2016-imilu imminut toquttunit 47-usunit ikinnerugaluarlutik, amerlassusaat ukiuni siuliinut naleqqiullugit allanngorpallaanngillat.
Siorna imminut toqoriarnerit 94-iupput, 2016-imilu 63-iummata amerleriarsimallutik.
Amerlavallaartullu peqqinnissamut naalakkersuisoqarfimmi peqqissutsimut suliaqarnermi siunnersorti Tina Evaldsen isumaqarpoq.
- Kisitsisit taama amerlariarsimasut soorunalimi ernumanartorujussuuvoq. Aappaatigulli meeqqat inuusuttullu akornanni inuiaqatigiinnilu isummakkut peqqissutsikkut arlaatigut unamminartortaqartoq sulianni tusareerakku tupaallappallaanngilanga, Tina Evaldsen oqarpoq.
AAMMA ATUARUK Antallet af unge der begår selvmord ikke faldet
Inuunermi anniaateqarneq
Tina Evaldsen isumaginnittoqarfimmi atuarfeqarfimmilu pinaveersaartitsinermik suliaqartuuvoq.
Inullu imminut toqoriartoq ikiortissarsiortuusinnaasoq taassuma oqaatigaa.
- Ikiortissamik immaqa oqariartuutaavoq. Immaqa toqorusunngikkaluarluni ikiortissaaleqilluni aqqutissaarutivittutut misigisimagami taama pissusilersortoq, Tina Evaldsen oqarpoq.
Sunali pissutaasarnersoq oqaatigiuminaattoq erseqqissaatigaa.
- Pissutaasinnaasut assigiinngitsorujussuusinnaapput, TIna Evaldsen oqarpoq.
Inissaaleqineq, ilinniagaqannginneq ilinniarnissamillu periarfissaqannginneq, suliffissaaleqineq, inuuniarnikkut ajornartorsiuteqarneq, atornerluinermik ajornartorsiuteqarneq kinguaassiuutitigullu atornerlunneqarneq ilaatigut pissutaasinnaasut Evaldsenip oqaatigaa.
AAMMA ATUARUK Imminnut toquttunut qimagaasut nalorninartorsiulersartut
Peqqissutsimullu naalakkersuisoqarfik imminut toqunnerup pinaveersaartinnissaanut arlalinnik suleqateqarpoq, imminut toqunniartoqartillugu naleqquttumik qanoq qisuariarnissamut ikiuinermik, pinaveersaartitsinermullu oqaloqatiginnissinnaanissamut sammisamut suliaqartunit ilinniarfinni toraagaqarluni iliuuseqarnermik ilaatigut sulissuteqarlutik.
- Imminut toqunnissamut pinaveersaartitsinermi oqaloqatiginnissinnaaneq pillugu pikkorissarnerit ingerlappagut. Aamma siorna pikkorissaareerpugut, Kommune Kujallermilu maajimi pikkorissaaqqissapput. Taannalu kommunikkaarlugit siammarnissaa pingaaruteqarpoq, peqqissutsimut naalakkersuisoqarfimmi peqqissutsimut suliaqarnermi siunnersorti Tina Evaldsen ilaatigut oqarpoq.
Ajornartorsiuteqaruit, imminut toqunnissamik eqqarsaateqaruit imminut toqussimasumilluunniit nalaataqarsimaguit Attavik normumut 146-mut akeqanngitsumik sianerlutit siunnersorneqarsinnaavutit.
AAMMA ATUARUK Nunavummi imminut toquttut ikilisimasut
