Nunavummi imminut toquttut ikilisimasut
Nunavummi imminut toquttarneq nunap ilaani ajornartorsiutaanerpaasimavoq, maannalu nutaarsiassatsialaqartoq, Nunavummi nakorsat toqusimasunik misissuisartuisa CBC NEWS-imut oqaatigaat.
Nunavummi imminut toquttut 2017-imi 25-upput. Taakku soorunami amerlavallaarput, imminulli toquttut amerlassusaat ukiup siulianut sanilliullugit ikinnerupput.
AAMMA ATUARUK Canada: Imminut toqunnermut pinaveersaartitsinissamut periusissiaq nutaaq
Naggueqatigiit Inuit akornanni imminut toquttut Canadamiunut allanut sanilliullugit aqqanileriaammik amerlanerupput. Angutillu 15-it 29-llu akornanni ukiullit amerlassusaasa akornanni imminut toquttut qimerlooraanni tassani ingasanneruvoq, tassami naggueqatigiinnit inunninngaanneersuunngitsunut sanilliukkaanni 40-riaammik amerlanerupput.
Canadami naalakkersuisut Nunavummi imminut toquttarnermik pinaveersaartitsinissamut 75 millionit koruuninik immikkut tunniussaqarput. Aningaasat pingaartumik nunaqarfinni atorneqassapput.
Arfiani sapaatip akunneranut ataasiarlutik marloriarlutilluunniit inuusuttunut qititsitsisoqartarpoq tassanilu inussuttut nukissatik qitinnermut atorlugit peqqissumik ataatsimoorsinnaapput. Nunaqarfimmi Sanerajammi angutip angutinut ajornartorsiutinik annissuiffiusinnaasoq oqaloqatigiittarfik pilersippaa.
AAMMA ATUARUK Imminut toquttarnerup pinaveersaartinniarnera Nunavimmi sammineqartoq
Facebook iluaqutaasoq
Facebookimili qupperneq inuit allaffigisinnaasaat, kinaassutimillu isertuussilluni ikiortissarsiornissamut pisariaqartitsisumik nalunaarutiginnittoqarfiusinnaasoq iluaqutaanerpaavoq.
Aammattaaq oqarasuaat meeqqanit inuusuttunillu ulloq unnuarlu sianerfigineqarsinnaasoq pilersinneqarpoq.
Suliniutit tamarmik imminut toquttarnerup pinaveersaartinneranut iluaqutaapput.