Inuusuttuaqqat imminut toquttartut ikileriarsimanngillat
Naak imminut toquttarnerup pinaveersaartinneqarnissaanut suliniuteqartoqaraluartoq, Nunatsinni inuusuttuaqqat 18-iliineqanngitsut imminut toquttartut ikileriarsimanngillat.
![](/sites/default/files/styles/image_934x467/public/gravplads-kirkegaard-qaqortoq.jpg?itok=YQqYR4NJ)
Inuusuttuaqqat 18-it inorlugit ukiullit sisamat siorna imminut toqussimapput. Qulingiluallu imminut toqoriaraluarsimallutik.
Inuusuttuaqqat imminut toqussimasut toqoriaraluarsimasullu agguaqatigiisillugit 16-inik ukioqartut, Kalaallit Nunaanni politiit kisitsisaataasa takutippaat.
Nunatsinni imminut toqussimasut imminullu toqoriaraluartut nalunaarsorneqarsimasut katillugit 109-upput, taakkunannga angutit amerlanerussuteqarlutik.
Isummakkut nanertisimaneq imminut toqoriarnermut imminullu toqunnermut aallaaviukkajuppoq, taavalu aamma asanninnerup tungaatigut aliasuuteqarneq inuunermillu avaanngusuuteqarneq aallaaviukkajuttartut, Kalaallit Nunaanni politiit tusagassiuutinut nalunaarummi allappoq.