Borgmesterip upalungaarsimasuutitat Tasiilaliaqatiginiarai

Tasiilap oqaluttuarisaanerani ukiortaarneraniit sapaatit akunnerit marlunngajaat qaangiuttullu alianartumik pisoqarpoq. Illoqarfimmi 2000-inik innuttaqartumi inuit marluk imminnut toqunnerisa toqutsisoqarneratalu kingorna innuttaasut aliasupput. Tamannalu tunngavigalugu Kommuneqarfik Sermersooq upalungaarsimasuutitanik ataasinngornermi Tasiilaliartitsilerpoq.

Borgmester Asii Chemnitz Narup ingerlatsivimmi pisortaq Grethe Nielsen peqatigalugu Tasiilamut ataasinngornermi aallassaaq. Kommuni KNR-imut taama ilisimatitsivoq.

Kommunip illoqarfimmi sulisui ilungersortut tapersersorniarlugit Tasiilaliarniarput, aamma tarnip nakorsaanik tarnillu pissusaanik ilisimasalinnik arlalinnik upalungaarsimasuutitat innuttaasut pisunit alianartunit eqqugaasut ikiorserniarlugit Tasiilaliartinneqassapput.