Ilulissani toqutsineq: Politiit eqqarsartaatikkut misissuinerup naammassineqarnissaa utaqqigaat

Ilulissani eqqaavissuarmi inuup timaata ilaanik siorna oktobarip ulluisa aappaanni nassaartoqarpoq.

Ullut pingasut qaangiunnerani timip ilaanik nassaartoqaqqippoq.

Suliamut atatillugu inuit pingasut tigusarineqarput, taakkunanngalu ataasiinnaq – tassa angut – tigummineqarallarpoq toqutsisutullu pasineqarluni.

Taanna suli tigummineqarallartoq, Kalaallit Nunaanni Politiit paasissutissiissutigaat.

AAMMA ATUARUK Ilulissani toqutsineq: Angut pasineqartoq suli tigummigallarneqassasoq

Angut eqqarsartaatimigut misissorneqarnikuuvoq, politiillu tarnimikkut napparsimasunut pinerluuteqarsimasunut immikkoortortaqarfimmit misissuinermit nalunaarut utaqqivaat.

Eqqarsartaatikkut misissuineq akissutissarsineqareerpat aatsaat unnerluutiginnittoqarsinnaavoq. Taamaammallu eqqartuussivimmi suliaq aatsaat tassani ullulerneqarsinnaassalluni.

Politiit eqqarsartaatsikkut misissuinermit nalunaarut qaqugu pissarsiarissanerlugu naluaat.

- Suliamik misissueqqissaarnermut naammassereerparput, kisianni misissueqqissaarneq eqqarsartaatikkut misissuinermit nalunaarutip pissarsiarereernerani aatsaat pisortatigoortumik naammassisinnaavoq, Politiit tusagassiuutinut attaveqaqatigiinnermullu suliaqartuat, Nadia Ankerfelt Rasmussen KNR-imut akissuteqarpoq.

AAMMA ATUARUK Pinerluttoqarsimaneranik toqusoqarneranillu misissuisartut Danmarkimit Ilulissanut tikittut

Politiit qatserisartullu ikuallaavimmi paasissutissanik ujartuillutik ullorpassuarni misissueqqissaarput.

Suliaq peqqarniitsumik aallaaveqarmat Kalaallit Nunaanni Politiit Danmarkimut ikiortissarsiorput. Pinerluttoqarsimatillugu toqusunillu misissuisartut Ilulissanut toqunneqarsimasup kinaaneranik qanorlu toqusimaneranik misissuiartorput.

Tamatuma kingorna inuit pingasut tigusarineqarput. Ataaserli aqaguani iperagaavoq, marlullu eqqartuussivimmi matoqqasumik sassartinneqarlutik.

Tamanana ataatsip – tassa angutip – tigummigallarneqarneranik kinguneqarpoq. Aappaalu – arnaq – ulluni pingasuinnarni tigummigallarneqarluni.

Kalaallit Nunaanni Politiit toqutaasup aqqa sapaatip akunnerata qaangiunnerani saqqummiuppaat, taannalu tassaalluni angut 24-nik ukiulik Ilulissaneersoq.