Pinerluttoqarsimaneranik toqusoqarneranillu misissuisartut Danmarkimit Ilulissanut tikittut
Ilulissani politiit toqutsisoqarsimaneranut suliamut tunngatillugu marlunngornermi ualikkut naatsumik ilisimatitsipput.
Kalaallit Nunaanni Politiit misissuinermut immikkoortortaqarfiani pisortap, Jan Lambertsenip Danmarkimit pinerluttoqarsimaneranik toqusoqarneranillu misissuisartut Ilulissanut misissuinerup ingerlanerani ikiuukkiartorlutik tikissimasut oqaatigaa.
- Misissuisartunit misissorneqartussanik paasissutissarpaaluuteqarpugut, Jan Lambertsen oqarpoq.
AAMMA ATUARUK Politiit suli paasisaqanngitsut: Toqutsinermik suliami ullut sisamassaat paasiniaasut
Politiit oqarnerat naapertorlugu misissuisartut toqutaasimasup kinaaneranik paasisaqangajalernerat naatsorsuutaavoq, Paasissutissat kingulliit inissinnissaannut tunngavoq, Jan Lamberthsen tusagassiortunut ullumi paasissutissiinermi oqarpoq.
- Paasissutissat kingulliit inissinnissaat amigaataasoq ilimagaarput, kisianni misissuinermut uppernarsaataasinnaasunullu tunngatillugu annerusumik oqaaseqarsinnaanngilanga, Jan Lambertsen oqarpoq.
Paasissutissat nutaat
Politiit tamatuma saniatigut ikuallaavimmi misissugassanik allanik aamma nassaarput. Politiit sumik nassaarsimanerat politiit misissueqqissaarneq pissutigalugu oqaatigerusunngilaat.
Jan Lambertsen, Kalaallit Nunaanni Politiit misissueqqissaarnermi immikkoortortaani pisortaavoq.
Ikuallaavimmi nassaarineqartunik misissugassaqarpugut. Tamanna annerusumik oqaaseqarfigisinnaanngilara, kisianni arlalinnik soqutiginaateqartunik nassaarpugut, Jan Lambertsen oqarpoq.
Politiit qatserisartullu ikuallaavimmi eqqagassanik ulluni arlalinni misissuipput.
Tamanna Ilulissani ikuallaaviup eqqaani inuup timaata ilaanik nassaartoqarneranik politiit sapaatiummat nalunaaruteqarnerata kingunerisaanik pivoq. Inuup timaata ilaanik nassaartoqaqqittoq politiit marlunngornermi paasissutissiissutigaat.
Qatserisartut politiillu eqqagassat tamarmik ataasinngorneq oktobarip ulluisa aqqarnanni misissoreersimassagaat politiit maanna nalilerpaat.
Qatserisartullu ikiuunnerat nalilerneqarsinnaanngitsoq, Jan Lambertsen erseqqissaavoq.
- Qatserisartut ikiuunerat annertoorujussuusoq isertuussassanngilaq. Suliarineqaleruttortoq annertoorujussuuvoq, misissueqqissaartartut pisortaat oqarpoq.