Ullumi, marlunngornermi eqqakkat naqqani suli ikuallattoqarpoq. Assi: KNR

Ilulissani ikuallattoq: Saviminikut qamisaaniarnermut ajornakusoortitsisut

Eqqaavissuaq pingasunngormat ullup qeqqanngitsiartorli ikuallalerpoq. Qanoq ikuallalersimanera suli ilisimaneqanngilaq.

Ilulissani qatserisartut eqqaavissuarmi sapaatip-akunnerata siulianili qamisaallutik ulapputilerput.

Ullumi, marlunngornermi eqqakkat naqqani suli ikuallattoqarpoq. Biilikut savimerngillu allat eqqaavissuarmi kissalluaqqapput, tamannalu qatserisartut qamitsiniarnerannut nillortitsiniarnerannullu ajornakusoortitsivoq.

- Savimineq kissangaatsiarami nunap iluaniittoq qaleriissarnikut. Biilikut taavalu tankisorsuit assigiinngitsullu, Ilulissani qatserisartut ittuata tullia, Emanuel Petersen oqarpoq.

Eqqaavissuarmi uuliakumik, 22.000 literit missaanniittumik sumiiffinni marlunniittoqartoq ilanngullugu oqaatigaa. Uuliali ikuallakkaluaruni pujuliornera qernertuusussaammat uanilu taamaannani uulia ikuallanngitsutut nalilerpaa.

- Paasisakka ataaseq 10.000 literit missaannik imaqarpoq. Aappaa anginerulaartoq 12.000 literit sinnilaarlugit imaqarsimavoq, Ilulissani qatserisartut ittuata tullia, Emanuel Petersen KNR-imut oqarpoq.

Uuliakoq 22.000 literit missaanniippoq.

Uulialli piffissap ilaani ikuallalersinnaanerarpaa.

- Asuki nalunartua, saviminikorpassuit akornaniikkamik. Immaqa ikumasimassaaq, ernumanartoqanngilaq massakkut ikummaattoqarnissaanik uuliamik, kisianni nillusaaneq ulloq unnuarlu ingerlavoq, Emanuel Petersen oqarpoq.

Upalungaarsimasulli eqqaavissuup naqqani suli qaminneqarsimanngitsumut nunamut saligaasiorlutik qamisaaniarsaripput.

AAMMA ATUARUK Ilulissani innuttaasoq: Anersaartorniarneq qasilippoq

Kommunip suliassinneqartoq eqqaavissuarmi nivattaassuarnik aamma assaatippaa.

- Allatut ajornartumik imeq annertuumik pisariaqartipparput, Emanuel Petersen oqarpoq.

Qasigiannguani qatserisartut Ilulissanut ikiuukkiartorlutik aamma tikissimapput. Uummannamiit qatserisartut sisamat aamma qamisaaqataasinnaalissapput.

Suli nassuiaatissaqanngitsoq

Ikuallattumik qamisaanermi illoqarfiup imermik pilersuineranit imaaniillu imermik atuinikkut ingerlanneqarpoq.

Air Greenlandip qulimiguuliutaasa ilaat imaanit imermik aalleriarluni eqqaavissuarmut aamma kuioraanermut atorneqarpoq.

Ikuallanneq pingasunngormat ullup-qeqqanngitsiartorli aallartippoq.

Eqqaavissuup qanorpiaq ikuallalersimanera ilisimaneqanngilaq. Sulisulli marluk eqqaavissuarmi nakkutiginnittut sumiiffik nalunaaqutaq 11.00 qimaleramikku allanartumik takusaqanngillat. Pujornera nalunaaqutaq 11.30-p missaani takuneqarpoq. 

AAMMA ATUARUK Ilulissani eqqaaveqarfiup ikuallannerani ulorianartumik pujortoq

Eqqaavissuaq kingullermik ukiut pingasut matuma siorna ikuallarpoq. Taamanilu ikuallatsinneqarsimasoq paasineqarluni.

Ikuallattumit pujorneranit niaqorlunnermik, nukillaanganermik, merianngunermik uissanngunermilluunniit malugisaqartut Ilulissani napparsimmavimmut oqarasuaammut 94 32 11-mut saaffiginneqquneqarput.

Ikuallattoqarnera pillugu paasissutissaateqartoqaruni Ilulissani politiit oqarasuaammut 70 14 22-mut attavigineqarnissaat kaammattuutigineqarpoq.

Ikuallannera qanoq aallartissimanersoq suli ilisimaneqanngilaq.

KNR-ip eqqaavissuarmi uuliaqarsinnaanera pillugu Kommunip Avatangiisinut Teknikkeqarnermullu immikkoortortaqarfia oqaaseqartinniaraluarpaa. Tassangali akissuteqartitsinissaq marlunngornermi ualikkut iluatsissimanngilaq.

 

Timelapse brand Ilulissat af Paarnannguaq Andersen

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat