Ilulissani eqqaaveqarfiup ikuallannerani ulorianartumik pujortoq
Ilulissani eqqaaveqarfimmi ikuallangaatsiartoqarnerani ulorianartumik pujuliortoqarpoq.
Ikuallanneq ullup-qeqqanngitsiarnerani aallartippoq. Innuttaasut ikuallattoqarneranit qaartoortoqaratarsinnaanera pissutigalugu qanillinaveersaassapput, igalaatillu matoqqatissallugit, Avannaata Kommuniani upalungaarsimasut paasissutissiipput.
Ikuallattumit pujoq illoqarfiup tungaanukaarpoq.
- Tankeqarlunilu nappartaqarunarmat qaartoornernik pisoqartarpoq. Taamaammat biilinik angallatillit eqqaaveqarfimmut sangusariaata eqqaani uninngaqqusaanatillu palliguteqqusaanngillat Avannaata Kommuniani upalungaarsimanermut pisortaq, Jens Dahl oqarpoq.
- Maannakkut anorikippoq pujorlu illoqarfiup tungaanut ingerlarusaarpoq. Taamaammat pujoq illoqarfimmut annguppat innuttaasut matunik igalaanillu matoqqatitsissapput, taanna oqarpoq.
Sumiiffik assersorneqartoq
Politiit maanna eqqaaveqarfiup eqqaaniillutik sumiiffimmik assersuipput.
Qatserisartut ikuallattup nalunaarutigineqarneraniilli sumiiffimmiilerput, qatserisartulli ikuallattumik qamitsisinnaanngillat.
Ikuallattoqarnerani innuttaasunut maanna ulorianartorsiortitsisoqanngilaq, taamaakkaluartorli innuttaasut sumiiffimmut qanillattunnginnissaat inassutigaat. Timmisartukkut angallanneq ikuallattoqarneranit aamma sunnerneqanngilaq.
Upalungaarsimasut pisortaata oqarnera naapertorlugu eqqaaveqarfimmi nakkutiginnittut marluk sumiiffik nalunaaqutaq aqqanermut qimakkamikku allanarsinnaasumik malugisaqanngillat. Pujornera nalunaaqutaq ullup-qeqqanut qiteqquttoq paasineqarpoq.
- Ikuallannerup qanoq aallartissimasinnaanera ilisimaneqanngilaq, kisianni eqqakkat ikuallangaatsialersimammata inneq suli qaminneqarsinnaanngikkallarpoq. Taamaammat inneq maannamut aqunniarsariinnarsinnaavarput, upalungaarsimanermi ingerlatsisoq nassuiaavoq, upalungaarsimanermut pisortaq, Jens Dahl oqarpoq.
Eqqaaveqarfik ukiut pingasut matuma siorna kingullermik ikuallappoq. Taannalu ikuallatsitsinikkut pisimalluni.
Video: Paarnannguaq Andersen