Ilulissani innuttaasoq: Anersaartorniarneq qasilippoq

Ilulissani eqqaavissuaq qatserisartut ullut kingullit pingasut qamisarpaat, sulili ikuallappoq.

Silami anersaartorniarneq qasilisoortoq, pujorsunni illup iluanut isaasoq silagikkaluartorlu aneertoqarsinnaanani. Ilulissani innuttaasut ilaat KNR-imut taama oqaluttuarpoq.

- Anerpiartanngilagut isersimaannarpugut, igalaanik ammaasinnaanata. Anigaluaraangatta qasilittarnermut, anersaartorfigut qasilillutik pujuata tikka sakkortunermut. Taamaammat meeqqat aneersinnaanngillat tiperartorujuugami, Iluliarmiu Kristine Lennert oqarpoq.


Ikuallassunni illup iluanut isaammat innuttaasut ilaasa silaannarissarfiit assersorsimavaat. Assi: Nammineq pigisaq.

Ilulissani eqqaavissuaq pingasunngormat ikippoq, maannalu ullut pingajussaani suli qamisarneqarluni.

- Ikuallaleqqaarnerani putsup qernertuliornerani arsakut illoqarfimmut nakkaapput tipeqartorujussuullunilu, Kristine Lennert oqarpoq.

Eqqaavissuaq ullumi arfininngornermi suli ikuallappoq, qatserisartullu suli qamisaallutik.

Kajumissutsimik suleqataasut qamisaaqataapput

Eqqaavissuarli qameqqajanngimmat Ilulissani innuttaasut ullut arlallit suli pujormiuusariaqartut Avannaata Kommuniani upalungaarsimanermut pisortaq oqarpoq.

- Ikuallaffiusup naqqani tikikkuminaatsunik suli ikuallattoqarpoq taakkua qatserneqarput. Suliaq suli ingerlapparput kisianni nalunarpoq qaqugu qaminneqassanersoq, Jens Dahl oqarpoq.

Innermut qamisaaneq illoqarfiup imeqarfianit immamiillu pivoq.

- Inuit piumassutsiminnik ikiuukkumallutik nalunaarnikut massakkut atulereernikuuagut. Inuppassuaqarpoq qujanartorujussuarnik, Iluliarmiut tassuunakkut ikiuukkusunnerat assut qujamasuutigeqaarput.

Air Greenland ikuallattumut qamisaanermi aamma ikiuuppoq, qulimiguulik immamut imertariarluni ikuallattumut qamisaaqataasoq Jens Dahl KNR-imut paasissutissiivoq.

Politiit: Pujoq takkuppat igalaat matugisigit

Anori illoqarfiup tungaanut saqippat pujuliulerlunilu innuttaasut angerlarsimanissaannik, igalaanik matunillu matoorinissaannik Kalaallit Nunaata Politiivinit sisamanngornermi kaammattuutigineqarpoq.

Putsumik najuussisoorsimalluni, niaqorluleraanni, nukillaangalerluni, merianngulluni iluaalleqqajaalluniluunniit taava Ilulissat napparsimmavianut 943211-mut sianertoqarsinnaavoq.

Allanillu paasissutissaateqaraanni Ilulissani politiit 70 14 22-mut sianerfigineqarsinnaapput.

Ikuallanneq qanoq aallartissimanersoq suli ilisimaneqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat