Piumassutsiminik qamisaaqataasoq: Tupannartorujussuuvoq

Sisimiut avannamut kangiatungaani Kangerluarsuk Tullermi nuna ikuallattoq ikummaqqimmat nammineq piumassutsiminnik qamisaaqataasut arlallit qatserisartuntu ikiuupput.

Qamisaaqataasut ilagaat Leif Alaufesen. Taanna KNR-imut oqaluttuarpoq kangerluup qinnguani ikuallattoq takugamiuk tupassimalluni.

- Qanilligaluttuinnarnerani inneq annertoorujussuaq takusinnaavara. Sulisunilluunniit imatut takusinnaanngilagut pujorsuaq annertungaarmat, Leif Alaufesen oqaluttuarpoq.

Illuaqqat aarlerinartorsiortinneqartut ikuallatsaaliorneqarnerat maannamut iluatsittoq Qeqqata Kommuniani upalungaarsimasut pisortaat ilisimatitsivoq.

- Massakkorpiaavik illuaqqat, ulluni kingullerni ulorianartorsiornikut, illersornissaat iluatseqqavoq. Taamaalilluta nuna masatserlugu, imermik immerlugu, illersuinerput iluatsippoq. Taavalu ikuallattoq illuaqqanut qaninneq annertuumik ikummaraangat sukkasuumik qamisapallattarlugu, Qeqqata Kommuniani upalungaarsimanermut pisortaq, Ole Kreutzmann oqarpoq.

AAMMA ATUARUK Qatserisartut 38-it Danmarkimiit ikiuukkiartussasut

Namminersorlutik Oqartussat sapaammi unnukkut nalunaarutigaat Nunatsinni upalungaarsimanissamut ataatsimiititaliarsuup Danmarkimit qatserisartut 30-it ikiuukkiartornissaat qinnutigalugu saaffiginnissutigisimagaat. Ullumikkullu marlunngornermi Danmarkimi upalungaarsimanermut ataatsimiititaliarsuarmit qatserisartut 38-it atortussaallu Kangerlussuarmullu aallartinneqarput.

- Taava aqagu aatsaat Sisimiunut atortut inuttallu tikeralersinnaallutik. Tikerarpata piaarnerpaamik ikuallaffimmukaatissavagut. Taamaalilluta siullertut killilersuineq taavalu qamisaaneq aallartilluarsinnaanngussavarput, Ole Kreutzmann oqarpoq.

Nunap iluatigut ikumasoq

Nunammi ikuallannera, juulimili ikumalersoq, sapaammi unnukkut anorip sammiviata nikereerneratigut, ulapalungaarsimasut siornatigut siaruarnermik taama annertutigisumik sukkatigisumillu takunikuunngisaannik, siuaruarpoq.

- Ikuallattoq ilaa nunap iluaniikkami. Taannalu tassaangami aarlerinarnerpaaq. Pissutigalugu takoreernikuuarput ikuallattoq qamiivilluni qamittoq. Sumilluunniit pujoqanngitsoq. Taava killinganinngaanniit 200 - 300 meterimit nutaamik aallarteqqilluni. Nunap iluatigut ingerlalluni, Ole Kreutzmann oqarpoq.

Ikiuuttussallu tupannarsinnaasumik takusaqarsinnaanissartik naatsorsuutigisariaqassavaat.

- Tassa tupattorujussuuvunga inneq annertungaarmat. Allaammi qanoq siaruaatsigisimammat. Avannamut, kujammut qummullu. Nunarujussuaq annertooq ikummassimavoq takusanni tassani. Tupannartorujussuuvoq, Leif Alaufesen oqarpoq.

AAMMA ATUARUK Illuaraqarfimmi nunap ikuallannera siaruapiloortoq