Illoqarfiup politikerii angaasut: Hans Egedemut eqqaassutissaq nikissanngilaq

Hans Egedep eqqaassutissaa nikissanngilaq. Danskip norskinit kingoqqisup ajoqersuiartortup eqqaassutissaa Nuummi Nuutoqqami qaqqap nuuaniiginnassaaq.

Tamanna kommuneqarfik Sermersuumi kommunalbestyrelsip aalajangiiffigeqqammerpaa. Aalajangiineq pissannganartortaqarpallaanngilaq, illoqarfiummi politikeriisa innuttaasunut taasititsinerup inernera juulip ulluisa 21-anni naammassisup inernera anngaaffigiinnarpaat: Taasititsinermimi eqqaassutissap uninngatiinnarneqarnissaanut amerlanerussuteqartut taasipput: Taasisut 62 procentiisa uninngatiinnarniarpaat 38 procentiisalu peersikkusullugu.

AAMMA ATUARUK Taasititsinerup kingorna: Illoqarfiup politikeriisa Hans Egedemut eqqaassutissaq pillugu suliaq inerniliiffigissavaat

Kommunip ataatsimiittarfiani eqqaassutissap oqallisiginissaata ilisimatitsissutigineqarnerani oqallittoqanngilarluunniit – kommunimi politikerit angiinnarput – oqallinnerlu taamaalilluni naggaserneqarluni.

Oqallinneq aallarteqqissaguni politikkikkut siunnersuuteqartoqaqqaassaaq. 

Qalipanneqartoq

Eqqaassutissap oqallisigineqangaatsiartup taasititsissutigineqarnera juunip ulluisa 25-annili aallartinneqarpoq. Tassunga ullut pingasut sioqqullugit – imaluunniit oqaraanni inuiattut juunip ulluisa 21-anni ullorsiornerup unnuaani – eqqaassutissaq aappaluttumik qalipanneqarpoq, ”Decolonize”-millu allagartalerneqarluni seqqartarneqarluni.

Taamaaliortoqarnera ammip qalipaataa aallaavigalugu immikkoortitsisarnerup nunarsuaq tamakkerlugu oqallisigineqangaatsialernerani ikinnerussuteqartut pisinnaatitaaffii pillugit akerliussutsimik takutitsisoqaqqaalerneranik aallaaveqarpoq.

AAMMA ATUARUK Qilerteq, iperartortinneq kakiornerillu: Hans Egede pillugu oqaluttuani suut ilumoorpat ilumuunngillalluunniit?

Hans Egedemut eqqaassutissaq Københavnimi oqaluffiup Marmorkirkenip eqqaaniittoq Nuummiittutulli qalipaammik aappaluttumik kuineqarlunilu allannerata assinganik allagartalerneqarpoq.

Nunarsuarmi sumiiffinni allani eqqaassutissat ammip qalipaataanik immikkoortitsinermut nunasiaataasimanermulluunniit attuumassuteqarsinnaasunik inuttaqartut aamma isornartorsiorneqarput ilaallu allaat uppisinneqarlutik.

Kommunip akisussaaffigigaa

Piffissamilu tassangali nunasiaajunnaarsaaneq, Danmarkimut attuumassuteqarneq, danskit naalagaaffiginninnerat, piorsarsimassuseq ileqqutoqqallu pillugit oqallittoqangaatsialerpoq.

Eqqaassutissap peerneqarnissaanut akerliusut illuatungaanni eqqaassutissaq peerneqassappat tamanna ataqqinninnginnerussasoraat. Taakkuli aanakkuisa aningaasat namminneq katersorlugit eqqaassutissaq 1922-mi napparpaat.

Tamatuma saniatigut kikkut tamarmik eqqaamasinnaasaannik eqqaassutissaq tassaniippoq – Hans Egedellu oqaluttuassartaa Nuup aamma oqaluttuassartarivaa, taassumami tamani Godthåb tunngavilerpaa.

Illuatungaanili inuusunnerusut eqqaassutissap allamut nuutsinneqarnissaanik isumaqarput – allamimi inissaqarluarpoq. Eqqaassutissap maanna inissisimaffigisaa nunatta nunasiaataaneranut danskillu naalagaaffiginninneranut takussutissiisoraat.

AAMMA ATUARUK Eqqaassutissamut akerliusoq: Oqallittoqalernera pitsaasuuvoq

Hans Egedep eqqaassutissaa nammineq katersiniarnerup inerneratigut 1922-mi napparneqarpoq, tamatumalu kingorna illoqarfiup innuttaasuinut tunniunneqarluni.

Kommunip eqqaassutissaq akisussaaffigaa. Taamaalilluni kommunalbestyrelsip eqqaassutissaq peerneqassanersoq peerneqassannginnersorluunniit aalajangersinnaavaa. Tassangali pilersaaruteqartoqanngilaq.

Taasititsinermi innuttaasut katillugit 1.649-t taasipput. Innuttaasullu 23.000-it taasisinnaasimallutik.