Hans Egede pillugu oqallittoqareernerani: Inuusuttut amerlanerusut maqaasivakka
- Isumaqarpunga nuutsinneqassasoq. Naluara sumut, kisianni Nuummi inissarpassuaqarpoq.
Josef Tarrak-Petrussen eqqaassutissap siunissaa pillugu Nuummi kulturikkut illorsuarmi Katuami oqallinnermut inuusuttuni peqataajartortuni ikittuni ilaasoq oqarpoq.
Sooruna?
- Eqqaassutissaq tappikaniilluni uagut ataaniippugut. Isumaqarpunga peerneqassasoq, Josef Tarrak oqarpoq, ilanngullugulu inuusuttut amerlanerusut oqallinnermut peqataajartornissaat amigaatiginerarpaa.
AAMMA ATUARUK Qilerteq, iperartortinneq kakiornerillu: Hans Egede pillugu oqaluttuani suut ilumoorpat ilumuunngillalluunniit?
Taanna tunngavilersuinissaq ussassaarutigineqarnernerulluarsinnaagaluartoq isumaqarpoq.
- Siullermik sapaammi unnukkuusoq paaseqqaarpara. Tunngavilersuinissaq pillugu takusaqarnangalu atuagaqanngilanga, taanna oqarpoq.
Inuit 60-it missaanniittut Katuap inersuaaraanut oqallinnermut peqataajartorput, amerlanerpaartaat ukioqqortunerupput.
Taamaakkarluartorli Josef Tarrak-Petrussenip peqataalluni taakku isumaannik tusagaqarnini nuannaarutigaa.
- Allat qanoq isumaqarnera tusarnerat qujamasuutigaara. Taamani pissutsit taamaattut sungiusimaneqartut oqaluuseraat, kisianni piffissaq maanna nutaajusoq taakkununnga oqaatigaara. Uanga pissutsit taamaannerat ilorrisimaarutigiinnarnianngilara.
"Oqaluttuarisaanerput eqqaamassavarput"
Ane Marie Ottosenili killormuuanik isumaqarluni eqqaassutissaq sumiiffigisaminiiginnassasoq isumaqarpoq.
- Eqqaassutissaq eqqaassutissallu allat illoqarfimmiittut eqqaassutissaapput. Oqaluttuarisaanerput eqqaamassavarput, taakku peerneqarunik nuunneqarunilluunniit eqqaassutissartaasa isumaat katassaaq, Ane Marie Ottosen oqarpoq.
Taava eqqaassutissaq nuunneqaruni puiorneqassava?
- Naamik, eqqaassutissaq nuunneqaruni puiorneqarnavianngitsoq isumaqarpunga, eqqaassutissalli amerlanerpaartaat oqaluttuarisaanitsinnut eqqaassutissatut inissitaapput.
Taasineq marlunngornermi unissisoq
Kommuneqarfik Sermersooq eqqaassutissaq maanna inissisimaffigisaminiiginnassanersoq nuunneqassanersorluunniit pillugu juulip ulluisa pingajuannili taasititsinermik ingerlatsivoq.
AAMMA ATUARUK Naliliineq: Eqqaassutissaq nuunneqassanngitsoq
Eqqaassutissap Nuutoqqamut sammisumi uninngatiinnarnissaanut 745-t ataasinngornermi unnukkut taasisimapput. Taasisullu 407-it eqqaassutissaq nuutsikkusuppaat.
Kommuneqarfik Sermersuumi innuttaasut taasisinnaapput. Innuttaasullu 1100-it ataasinngornermi unnukkut taasisimapput.
Taasititsineq marlunngornermi juulip ulluisa 21-anni nalunaaqutaq 23.59 unissaaq.