Naliliineq: Eqqaassutissaq nuunneqassanngitsoq
Hans Egedemut eqqaassutissap nuunneqarnissaa inissisimaffimminiiginnarnissaaluunniit pillugu taasititsineq marlunngorpat unissaaq.
Kommuneqarfik Sermersuup innuttaasut isumaannik tusarniaasarfiatigut Kommuneqarfigamik taaguutilikkut taasineq ingerlanneqarpoq.
Maannakkumut 322-it inissisimaffianiit peerneqassasoq taasipput, inissisimaffimminiiginnassasorlu 552-it taasillutik. Inissisimaffianiititsiinnarusullutillu taasisut amerlanerussappata eqqaassutissaq nuunneqarnavianngitsoq borgmesteri naqissusiivoq.
Hans Egedep eqqaassutissaanut taasineq
- Kommuneqarfik Sermersuumi innuttaasut juulip pingajuanniit 21-anut eqqaassutissap peerneqarnissaa inissisimaffimminiiginnarnissaaluunniit taasiffigisinnaavaat
- Juulip 22-aniit aggutsip qulingat ilanngullugu eqqaassutissap nuunneqassagaluaruni sumut nuunneqarnissaa, maannalu inissisimaffiata qanoq pineqarnissaa taasissutigineqassaaq.
- Taamalisoqareerpat akissutit siunnersuutillu katersorneqassapput. Aningaasaqarnermut Inuussutissarsiornermullu Ataatsimiititaliap inernerit aggutsip 20-ani saqqummiutissavai.
- Kommunalbestyrelse septembarip aappaani aalajangiissaaq
Tusarfik: Kommuneqarfik Sermersooq
- Amerlanerussuteqartut tassaniitiinnarusuppassuk soorunami taava kommunalbestyrelsemut ilisimatitsissutitut apuutissavarput aalajangingassartaqarnavianngimmat, Charlotte Ludvigsen KNR-imut oqarpoq.
Innuttaasunut ataatsimiititsineq
Nuummi innuttaasunut Katuami ataasinngorpat ataatsimiisitsisoqassaaq. Ataatsimiisitsinermi taasititsineq kisiat eqqartorneqassanngitsoq borgmesterip oqaatigaa.
Pisorli aallaqqaataaniit tassa inuiattut ullorsiornitta unnuaaniit pisut pillugit oqallittoqassasoq taanna oqarpoq.
Borgmesterip eqqaassutissaq qanoq pineqassanersoq isummerfigerusunngilaa,
- Uani uanga isumaga pingaarnerpaajunngitsoq oqarnikuuvunga, taavalu aamma ingerlanneqarnera innarlerusunnagu. Isummammi tamarmik inissaqartinneqarnissaat pingaaruteqarpoq taamaattumik isumaga erseqqissumik oqaatigisinnaanngilara, Charlotte Ludvigsen oqarpoq.
AAMMA ATUARUK Sermersuup inui Hans Egedemut eqqaassutissap qanoq pineqarnissaanik ima aalajangeeqataasinnaasut
Allakkatigut aamma taasisoqarsinnaavoq amerlanngitsulli taamaaliorsimapput.
Utoqqaat illui allakkatigut taasiffissanik 350-inik tunineqasimapput, maannamulli allakkatigut taasisut 22-nnaagallartut Kommuneqarfik Sermersuumut tunniunneqarsimasut attaveqaqatigiinnermut pisortap oqaatigaa.
