Hans Egede pillugu ataatsimiisitsineq: Kommunip takkussuulluartoqassasoraa
- Oqalliseqataasut amerlanissaat iliamagilluinnarpara.
- Oqallinneq inuit peqataaffigisinaannik ingerlalluarpoq, neriuutigaaralu unnugu inuit takkussuutissasut saqqumiisunut tusarnaarlutik eqimattanilu oqalliseqataallutik, Inge Olsvig Brandt, Kommuneqarfik Sermersuumi kommunalbestyrelsemut, Inuit Ataqatigiit sinnerlugit ilaasortaq, KNR-imut oqarpoq.
Unnugu ataatsimiinneq Hans Egedep eqqaassutissaa pillugu Katuami ingerlanneqalerpat taanna aqutsisuussaaq.
Pilersaarutit malillugit borgmesteri Charlotte Ludvigsen aqutsisussaagaluarpoq, napparsimammalli Inge Olsvig Brandtimit paarlanneqarpoq.
Kommunep juulip pingajuanniit inuttaasunut tusarniaanini aallartippaa.
Eqqaassutissaq Nuutoqqap tungaanut isikkiveqarluni inissisimaffigisamiiginnarnissaanut 736-t ataasinngornermi ualikkut taasisimapput - 405-illu nuutsinneqarnissaanut taasisimallutik.
AAMMA ATUARUK Naliliineq: Eqqaassutissaq nuunneqassanngitsoq
Kommuneqarfik Sermersuumi innutaasut taasisinnaatitaapput, ataasinngornerulli ualinerani taasisut 1100-it sinnilaaginnarpaat. Taasisinnaaneq marlunngornermi juulip 21-ani nalunaaqutaq 23.59 unissaaq.
Taasisut amerlassusaat naammaginarnersoq Inge Olsvig Brandtimit nalileruminaatsinneqarpoq.
- Nalileruminaatsippara qanoq naammagisimaarnartiginersoq taasisut taama "amerlatigitillugit" "ikitsigitillugilluunniit", Inge Olsvig Brandt oqarpoq nangillunilu:
- Taamaattoq inuit peqataanerat taaseqataanerallu uannut pingaaruteqartorujussuartut nalilerpara.
Olsvig Brandt: Sapaatit akunneri pingasut naammapput
Siumup Nuummi immikkoortortaqarfiata tusarniaanerup sapaatit akunnerinik pingasunik sivisussusullip, qaammatinut pingasunut sivitsorneqarnissaa siunnersuutigalugu isornartorsiornikuuaat.
Borgmesterilli aalajangernikuunera Inge Brandt Olsvigimit illersorneqarpoq.
- Isumaqanngilanga sivikippallaartoq. Sapaatit akunneri pingasut Hans Egedep eqqaassutissaa pillugu inuit oqallinnissaat naammappoq, Inge Olsvig Brandt oqarpoq.
Borgmesteri Charlotte Ludvigsen, eqqaassutissap qanoq pineqarnissaanut isummani saqqummiukkusunnikuunngilaa, Inge Olsvig Brandtili ammaneruvoq.
- Uanga inuttut nammineq isumaga imaappoq, qaqqajunnaq eqqaassutissap inissisimaffia inunnit katersuuffigineqarsinnaasariaqaraluartoq isumaqatigiinngiffiunani.
Unnugu nalunaaqutaq arfineq marlunut Kommuneqarfik Sermersooq ataatsimiinnermit Facebookkikkut toqqaannartumik aallakaatittsissaaq.