Eqqaassutissamut akerliusoq: Oqallittoqalernera pitsaasuuvoq
![](/sites/default/files/styles/image_934x467/public/104969514_767242877377302_4485323842458362457_n.jpg?itok=SrUB6CTV)
- Anguniakkatsinnik angusaqannginnerput pakatsissutigigaluarlugu oqallinnermik pingaartumik aallartittoqarnera nuannaarutigaara.
Kakiuisartoq, Paninnguaq Lind Jensen oqarpoq. Taanna inuit kakiueriaasitoqaannik kakiuisartutut ilisimaneqarpoq - taannalu Hans Egedep eqqaassutissaanut Nuummi Nuutoqqamiiginnarsinnaatinneqartumut aamma akerliusuuvoq.
Taassuma eqqaassutissap siunissaa pillugu oqallittoqarneranik pissangalluni malinnaasimavoq, eqqaassutissallu peerneqanngikkuni nuutsinneqarnissaa neriuutigisimallugu.
Taamali inerneqanngilaq. Eqqaassutissap siunissaa pillugu taasititsineq marlunngornermi unnukkut nalunaaqutaq 23.59 taamaatinneqarpoq, amerlanerussuteqartullu eqqaassutissap peerneqannginnissaanut taasipput: Eqqaassutissap uninngatiinnarneqarnissaanut 921-t taasipput. 600-illu peersitserusullutik.
Taamaakkarluartorli Paninnguaq Lind Jensen ilorrisimaarpoq.
AAMMA ATUARUK Borgmesteri eqqaassutissaq pillugu: Uninngatiinnarneqarnissaa ajunngilaq
- Inuit qanoq amerlatigisut qanoq isumaqarnerat ilorrisimaarutigalugulu tupaallaatigaara, taanna oqarpoq.
Oqallttoqaannassasoq
Atsiortitsinerit maanna katersorneqarput kommunimilu politikerinut nassiunneqassallutik.
Taasisut inerneri Aningaasaqarnermut ataatsimiititaliamut aggustip ulluisa 20-anni tunniunneqassapput. Tamatumalu kingorna kommunalbestyrelsip septembarip ulluisa aallaqqaataanni ataatsimiinnerani oqallisigisassaassalluni.
Eqqaassutissap oqallisigineqangaatsiartup taasititsissutigineqarnera juunip ulluisa 25-annili aallartinneqarpoq. Tassunga ullut pingasut sioqqullugit – imaluunniit oqaraanni inuiattut juunip ulluisa 21-anni ullorsiornerup unnuaani – eqqaassutissaq aappaluttumik qalipanneqarpoq, ”Decolonize”-millu allagartalerneqarluni seqqartarneqarluni.
Piffissamilu tassangali nunasiaajunnaarsaaneq, Danmarkimut attuumassuteqarneq, danskit naalagaaffiginninnerat, piorsarsimassuseq ileqqutoqqallu pillugit oqallittoqangaatsialerpoq.
- Eqqaassutissap peerneqarnera soorunami takorusunnerugaluarpara. Kisianni eqqaassutissap maannakkoqqissaaq peerneqarnissaa piviusorsiornerunngitsoq oqallinnermi malunginiarpara, Paninnguaq Lind Jensen oqarpoq.
AAMMA ATUARUK Hans Egedep eqqaassutissaata siunissaa pillugu nuannaartoqarluni ilorrisimaanngitsoqartoq: Innuttaasut piareersimanngillat
Taassumali taasititsinerup inerneqarnera pissutigalugu nunasiaajunnaarsaanerup, Danmarkimut atassuteqarnerup ileqqutoqqallu pillugit oqallinnerup ingerlaannarnissaa qularutiginngilaa. Taasititsinermi oqallinnermi naggataagallaannartoq isumaqarpoq.
- Sammisaq una siunissami soorunami qaqinneqaqqissaaq, piffissamilu tassani taasititsisoqarnissaa suli naleqqunnersoq naliliiffigineqarumaarpoq, Paninnguaq Lind Jensen oqarpoq.