Taasititsinerup kingorna: Illoqarfiup politikeriisa Hans Egedemut eqqaassutissaq pillugu suliaq inerniliiffigissavaat
Aasaanerani oqallisigineqangaatsiartoq – tassa Hans Egedemut eqqaassutissaq Nuummi Nuutoqqamiiginnassanersoq imaluunniit peerneqassanersoq pillugu oqallinneq ullumi nalunaaqutaq 15.30 uniffilerneqassaaq.
Tamanna Kommuneqarfik Sermersuumi kommunalbestyrelsit ataatsimiinnerminni taasititsinermut juulip ulluisa 21-anni naammassineqartumut angerneratigut pissaaq.
Hans Egede pillugu paasissutissat
- Hans Egede 1686-imit 1758-imut inuuvoq.
- Taanna Norgemi Lofotenimi palasiuvoq.
- Kalaallit Nunaannut ajoqersuiartorumalluni Norge Danmarkimilu Frederik sisamaat 1721-mi piumaffigai. Taassumami qallunaatsianik suli katuulleqarnissaa naatsorsuutigisimavaa.
- Hans Egedep Kalaallit Nunaanni vikingit 1721-mi ujarpai, nassaarinagilli. Taassumali inuit naapippai kristumiussuserlu pillugu ajoqersugarilerlugit.
- Hans Egedep maanna Nuuk tunngavilerpaa.
- Hans Egede nunatsinnit 1736-mi aallarpoq.
- Eqqaassutissaq Nuutoqqamiittoq Københavnimi Marmorkirkenip eqqaaniittup assilineraa.
- Eqqaassutissaq Nuummiittoq nammineq katersisoqarnerata kingunerisaanik 1922-mi napparneqarpoq.
- Eqqaassutissap napparneqarnerani taanna illoqarfiup innuttaasuinut tunniunneqarpoq.
- Eqqaassutissaq KGH-mit 1953 tikillugu akisussaaffigineqarsimavoq, tamatumalu kingorna Nuup Kommunianut maanna Kommuneqarfik Sermersuumut tunniunneqarluni.
Eqqaassutissiap sumiiffigisaani uninngatiinnarnissaanut amerlanerussuteqartut taasipput: Uninngatiinnarneqarnissaanut taasipput, 38 procentillu peersikkusullugu.
AAMMA ATUARUK Hans Egedep eqqaassutissaa pillugu taasineq naammassivoq: Eqqaassutissaq uninngaannassaaq
Taamaammat kommunalbestyrelsip ullumi akuersinissaa aamma pissannganarsimanngilaq. Eqqaassutissammi peerneqarnissaanut takussutissaqanngilaq. Eqqaassutissarmi peerneqassappat amerlanerussuteqangaatsiartut taasisimassasut, borgmesterip, Charlotte Ludvigsenip (IA) taasititsinerup aallartinnerani oqaatigaa.
Oqallinneq aallarteqqinneqassappat politikkikkut siunnersuuteqartoqartariaqarpoq.
KNR-ip Charlotte Ludvigsen ippassaq oqaaseqartinniaraluarpaa borgmesterili tamatumunnga piffissaqanngitsoq Kommuneqarfik Sermersuup nalunaarutigaa.
Qalipaammik kuineqartoq
Eqqaassutissap oqallisigineqangaatsiartup taasititsissutigineqarnera juunip ulluisa 25-annili aallartinneqarpoq. Tassunga ullut pingasut sioqqullugit – imaluunniit oqaraanni inuiattut juunip ulluisa 21-anni ullorsiornerup unnuaani – eqqaassutissaq aappaluttumik qalipanneqarpoq, ”Decolonize”-millu allagartalerneqarluni seqqartarneqarluni.
Taamaaliortoqarnera ammip qalipaataa aallaavigalugu immikkoortitsisarnerup nunarsuaq tamakkerlugu oqallisigineqangaatsialernerani ikinnerussuteqartut pisinnaatitaaffii pillugit akerliussutsimik takutitsisoqaqqaalerneranik aallaaveqarpoq.
AAMMA ATUARUK Qilerteq, iperartortinneq kakiornerillu: Hans Egede pillugu oqaluttuani suut ilumoorpat ilumuunngillalluunniit?
Hans Egedemut eqqaassutissaq Københavnimi oqaluffiup Marmorkirkenip eqqaaniittoq Nuummiittutulli qalipaammik aappaluttumik kuineqarlunilu allannerata assinganik allagartalerneqarpoq.
Nunarsuarmi sumiiffinni allani eqqaassutissat ammip qalipaataanik immikkoortitsinermut nunasiaataasimanermulluunniit attuumassuteqarsinnaasunik inuttaqartut aamma isornartorsiorneqarput ilaallu allaat uppisinneqarlutik.
Kommunip akisussaaffigigaa
Piffissamilu tassangali nunasiaajunnaarsaaneq, Danmarkimut attuumassuteqarneq, danskit naalagaaffiginninnerat, piorsarsimassuseq ileqqutoqqallu pillugit oqallittoqangaatsialerpoq.
Hans Egedep eqqaassutissaa nammineq katersiniarnerup inerneratigut 1922-mi napparneqarpoq, tamatumalu kingorna illoqarfiup innuttaasuinut tunniunneqarluni.
Kommunip eqqaassutissaq akisussaaffigaa. Taamaalilluni kommunalbestyrelsip eqqaassutissaq peerneqassanersoq peerneqassannginnersorluunniit aalajangersinnaavaa. Tassangali pilersaaruteqartoqanngilaq.
Taasititsinermi innuttaasut katillugit 1.649-t taasipput. Innuttaasullu 23.000-it taasisinnaasimallutik.