Illersornissaqarfiup Isertortumik Paasiniaasartuisa Danmarkip sakkutooqarnikkut saassunneqarsinnaanera maannakkorpiaq ilimaginngilaa

Danmark sakkutooqarnikkut saassunneqarnissaa aarlerinanngilaq.

Aarlerinartoqarneranik naliliinermi nutaami, tallimanngornermi Københavnimi Kastelletimi tusagassiortunik katersortitsinermi saqqummiunneqartumi, Illersornissaqarfiup Isertortumik Paasiniaasartui taamatut naliliipput.

Ruslandip Ukrainemut sorsunnera pillugu taama naliliisoqarpoq.

- Sorsunnissamik aarlerinartoqarneranik isumaqalernissarput Ruslandip anguniarpaa. Taama isumakuluuteqarnissarput kissaatigaa, Illersornissaqarfiup Isertortumik Paasiniaasartuini pisortaq Thomas Ahrenkiel oqarpoq.

- Ruslandip sakkutooqarnikkut saassussinissaa suli ilimaginngilarput, taanna oqarpoq.

Illersornissaqarfiup Isertortumik Paasiniaasartuisa naliliinerat naapertorlugu Illersornissaqarfiup aserorteriffigineqarsinnaaneranik siorasaarisoqariatarsinnaanera annertuvoq. Nunat NATO-mut ilaasortaasut sakkutooqarnikkut tatineqarsinnaanerat aamma taamaappoq.

- Rusland maannakkut Danmarkimut Kitaanullu assigiinngitsutigut sorsuttoq naliliivugut. Taakkua soqutigisaannut akerliusumik aalajangiinnginniassagatta, Thomas Ahrenkiel oqarpoq.

- Susoqarnersoq ersarippoq. Rusland assigiinngitsutigut sorsuppoq. Siornatigut naliliinitsinnut sanilliullugu tamanna sakkortunerulerpoq, taanna oqarpoq.

Sakkutooqarnikkut nukittorsaaneq

Umiarsuit mianersuaalliorlutik angalasut, Nato-mi nunat sakkutuuinut saassussisuusaarnerit aamma umiarsuit timmisartullu sakkutuujunngitsut sakkutuullu attaveqaataanut GPS-iinullu akornusersuinerit naliliinermi assersuutitut taaneqarput.

Aammattaaq Ruslandip NATO-mi nunat silaannartaannut innarleeqattaarnera assersuutaapput.

Ukiuni aggersuni Ruslandip Natomut navianartorsiortitsinerata annertusinissaata ilimanarnera Illersornissaqarfiup Isertortumik Paasiniaasartuisa nalilerpaat.

Illersornissaqarfiup Isertortumik Paasiniaasartuisa navianartuusut tallimaasutut nalilerpaat: navianaateqanngilluinnartoq, navianaataasoq, nalinginnaasumik navianaateqartoq, navianaateqarnerungaartoq, navianaaterujussuusoq.

Illersornissamut ministeri Troels Lund Poulsen (V) tusagassiortunik katersortitsinermi aamma najuuppoq.

Taassuma Thomas Ahrenkielillu piffissami kingullermi Danmarkimi annertuumik droneqarneranut tunngasut sukumiisumik oqaaseqarfigerusunngilaat.

- Sumik aallaaveqarnersut suli oqaasertalersinnaanngilarput, Thomas Ahrenkiel oqarpoq.

Danmarki ilungersunartumik inissisimaffeqartoq Troels Lund Poulsenip erseqqissarpaa.

- Danmark Natolu iliuuseqartariaqarput. Sakkutooqarnikkut nukittorsaanerusoqartariaqarpoq. Tamanna ataatsimoorunneqartariaqarpoq, taanna oqarpoq.

/ritzau/