Sociolog: Nunarput Danmarkilu suleqatigiittariaqarput

- Nunatsinni isumalluutissaarukkaangamik taamaaliortarsorinarput. Periarfissaarunnikuupput aammalu allanik saaffissaqaratik. Pisortani ikortissarsiporaluarlutik, naammattumik ikiorserneqarsinnaanatik isumaqarput, Steven Arnfjord oqarpoq. 

Inuusuttut atugarissaarnerulerumallutik Københavnimut nuukkaluarlutik,  atugarliornerulersimasut Kalaallit illuutaanni misissuinerup nutaap takutippaa. 

Inersimasut puigugaasarput

Nunatsinni atugarissaarnermut politikki eqqartorneqartillugu inersimasut puigorneqartutut ittartut Steven Arnfjord isumaqarpoq.

Meeqqat, innarluutillit utoqqaallu eqqartorneqarnerullutik. Inersimasut atugarliortut taamaalillutik amerligaluttuinnartut inooqatigiit pissusiinik ilisimasalik isumaqarpoq. Tamannali iliuuseqarfigineqarsinnaasoq taanna oqarpoq:

- Imaanngilaq neriuutissaqanngitsoq. Iliuuseqarfigineqarsinnaavoq. Angerlarsimaffeqanngitsuerunnavianngilaq. Tamanna inooqatigiinni pissusiuinnartarpoq. Tassa qaffasissumiittoqarpoq appasissumiittoqarlunilu, tamannalu piviusuuvoq avaqqussinnaanngisarput. Kisianni taakkua taamak amerlatigineri iliuuseqarfigisinnaavarput. Suliniutigisagut pitsaanerulersinnassavagut, Steven Arnfjord oqarpoq.

AAMMA ATUARUK Kalaallit inuusuttut atugarliornerulersimasut

Taanna nunatsinni angerlarsimaffeqanngissuseq pillugu misissuinermut tunngatillugu Odensemi ataatsimeersuarnermi oqalugiartussaavoq. Oqariartuutissatulli pingaarnertut anngukkusutaraa nunatta danmarkillu ataatsimoorlutik suleqatigiinnissaat.

- Taava oqartoqarsinnaavoq, imatut ataatsimeerusartoqarnerani qitiusumik oqariartuutaasoq tassaasoq, kivitseqatigiissaagut. Tamanna Naalagaaffeqatigiinni nunani immikkut iliuusissaanngilaq. Tamanna nunat taakku kattunnerisigut pissaaq, Steven Arnfjord KNR-mut oqarpoq.