Ilisimatuut orsugiassiorfiusimasoq pillugu piviusulersaarusiami naatsorsueriaaseq apeqquseraat
Nunatsinni aatsitassarsiortoqarsimanerani Danmark qanoq iluanaartigisoq piffissami Kalaallit Nunaanni Danmarkimilu oqallisaangaatsiarpoq.
Maanna pisortatigut oqallisigineqartumi 400 milliardit tungaanut iluanaarutaasut oqaatigineqarpoq, tamannali eqqunngitsoq ilisimatuut pingasut aalajangersimallutik isumaqarput.
DR-ip orsuigassiorfiusimasumut tunngasoq sapaatiummat saqqummiuppaa.
Kalaallit Nunaata aningaasaqarnermut siunnersuisooqatigiivisa siulittaasuat Torben Andersenip, piviusulersaarut peqataaffigigaluarinni ajorluinnartunik paasissutissiisoqartoq aarlerinartoqartippaa.
- Naatsorsuineq ajornartorsiortitsingaatsiarpoq, Torben Andersen nutaarsiassaqartitsivik BT-mut oqarpoq.
Ilisimatooq soraarneq Kjeld Møller Pedersen tv-kkut piviusulersaarutip isiginnaarnerani, eqqunngitsunik saqqummiisoqarneraalluni, tv-p saavani avoqqaarisimalluni nutaarsiassaqartitsivik Jyllands-Postenimut oqarpoq.
- Donald Trumpip nunarput soqutigineranik oqallittoqaleruttortoq aamma Kalaallit Nunaat naalagaaffinngornissaa oqallisigineqaleruttorfiani taama eqqunngitsumik paasissutissiisoqarnera, piviusulersarummi ilanngunneqannginnerat uggornarpoq, Kjeld Møller Pedersen allappoq.
Tamakkiisumik qanoq Danmark iluanaarsimatiginera paasissutissiissutigineqanngilaq, naatsorsuinerillu tamakkiisuunnginnerarpai.
Torben Andersenip oqarnera naapertorlugu Danmark iluanaaraluartoq aamma aningaasartuuterpassuaqartoq erseqqissaatigaa.
- Aningaasat kaaviaartitanit kisitsisit saqqummiunneqartut kiisalu aningaasartuuterpassuaqartoq, nutaarsiassaqartitsivimmut BT-mut oqarpoq.
Nutaarsiassaqartitsivik Berlingske aqqutigalugu DR-ip piviusulersaarusiornermi pisortaa allakkatigut akissuteqarpoq. Akissummini 400 milliard koruunit pineqartut ilisimatuunit aningaaserisuniillu isumaqatigiinngissutaasut oqaatigaa.
