Ilisimatusarnermi paasisat nutaat: Kalaallit Nunaat portusiartupiloorpoq
Nunatsinni sermersuup aakkiartornera pissutigalugu nunarsuup ilarujussuani imavissuit qaffakkiartornerinik siunissami kinguneqassasoq, nunatsinni pissutsit allaanerupput.
Nunammi portusiartornera immap qaffakkiartorneranit sukkaneruvoq.
Danmarkimi paasissutissanik pilersuinermut aqutsisoqarfik tusagassiuutinut nalunaarummi allappoq.
Nunattami ilaani qaarsuiit ukiut qulit ingerlanerinnaani 20 centimeterit tungaanut portusisimasut ilisimatusarnerup nutaap takutippaa.
Tassa ukiut 100-t ingerlaneranni nunap portusinera 2 meteriulluni.
- Nuna portusingaatsiarsimasoq maanna takusinnaalerparput. Kalaallit Nunaanni allanngorarnerit sukkasoorujussuupput inuuniarnermullu sunniuteqangaatsiarsinnaallutik, aamma qeqertaq ikkarluillu nutaat siunissami nunap assingani takussaalissapput, DTU Spacemi ph.d-niaq Danjal Longfors Berg tusagassiuutinut nalunaarummi oqarpoq.
Sermersuarmit naqeqqaneqartoq
Ilisimatusartut arlallit misissuinerannit inernerit nutaat atuagassiami Geophysical Research Lettersimi saqqummiunneqaqqammerput.
DTU Spacep misissuineranit inernerit nunatta sineriaani uuttuivinnit 61-ineersuupput.
Nunatsinni nunap portusiartornera pissusissamisoorpoq, aamma nunani allani taammaappoq.
Nunap sikoqannginnersanngorsimasup sermersuamit naqeqqaneqarnikuunera taamaanneranut pissutaavoq.
Naak ukiut 12.000-it missaata matuma siorna kingullermik sermersuaqarnerata naligigaluaraa, taammaattoq sikoqannginnersannguussimasoq suli portusiartorpoq.
Silap pissusia allanngormat sermersuup aakkiartornera sukkanerulerpoq, nunatsinnilu sinerissami nunap ukiuni qulikkaat kingullerni marlunni portusiartornerata sukkanerulerneranik kinguneqarpoq.
