Misissuineq: Nunatsinni issoq gassimik metanimik milluaasarpoq
Nunani Issittumiittuni issoq gassimik silaannarmik kissakkiartortitsisartumik, tassa metanimik silap kiannerulernerani qeriuaannartullu aaffiani aniatitsingaatsiartarunartoq qangalili ilisimaneqarpoq.
Nunarpulli metanimik aamma taama aniatitsitigisanngitsoq, Københavns Universitetip nunap qanoq issusianik pinngortitamullu tunngasuni immikkoortortaani ilisimatusartut misissuineranni nutaami erserpoq.
Metanimi milluarneqartartoq qeriuaannartup aaffiani aniasartuminngarnit annerusoq, ilisimatusartut nunatsinni sumiiffinni assigiinngitsuni aqqanilinni issup qanoq metaneqartigineranik misissuineranni erserpoq.
Nunatsinnimi issup qaava panertoq metanimik silaannarmiittumik agguaqatigiissillugu 65.000 tonsininngarnit annerusumik 2000-kkut aallartinneranniilli ukiut tamaasa milluaasartoq akerlianillu metani masarsummi isssumit aniasartoq agguaqatigiissillugu 9.000 tonsit missaanniittartoq, ilisimatusartut misissuinerminni inerniliuppaat.
- Kalaallit Nunaanni issup panertup qaavata metanimik silaannarmiittumik milluaasarnera taamaanneranut peqqutaaqataasunut ilaavoq, aammali Kalaallit Nunaata ilaa sikoqannginnersanngorsimasoq sumiiffinni allanisulli metanimik aniasoqartarneranik kinguneqarsinnaasumik kulstoffimik siornatigorninngarnit milluaanikinnerusalersimanera peqqutaaqataasunut aamma ilaavoq, immikkut ilisimasalik misissuinermilu aqutsisuusoq Bo Elberling oqarpoq.
Tappiorannartut aalajangersimasut issup qaavani panertumiillutillu iltiliusulimmiikkajuttut nunatta metanimik silaannarmiittumik milluaasarneranut peqqutaapput.
Nunattali taamaannera nunarsuup sinnerani silaannaap qanoq metaneqartigineranut sunniuteqangaarnaviarnanilu Issittumi silaannaap qanoq metaneqartigineranik nalunaarsuinermi aalajangiisuunavianngitsoq, ilisimatusartut aamma inerniliuppaat.
Tassa nunatsinni issoq Issittumi nunarsuullu sinnerani issusulli metanimik milluaatigisanngilaq.