Inatsisartut: Sullivinnik Nakkutilliisoqarfimmit isornartorsiorneqartareerlutik ukiaq mannamiit ullut ataatsimiiffissaat amerlineqartut

Inatsisartut ataatsimiinnerminni oqaluuserisassatik inuiaqatigiinnut pingaarutiliusut piffissaqarfigilluartariaqarpaat.

Inatsisartut Allattoqarfianni sulisut sulinermi atugaat aamma pitsaanerusariaqarput.

Inatsisartut siulittaasuat Mimi Karlsen (IA) tusagassiorfinnut taama nalunaarpoq.

Inatsisartut ukiakkut ataatsimiilernissaannut ullualuinnanngortut taamaaliorpoq. Tassa Inatsisartut siornatigut ulluni katillugit 20-t 25-llu akornanni ataatsimiittarsimasut ukiaq manna siullermeerlutik ulluni katillugit 30-ni ataatsimiittussanngorput.

Aaqqissuusseqqinneq misileqqaagassartik Mimi Karlsenip oqarnera naapertorlugu tassaavoq inatsisitigoortumik sulinermut tamatsinnik piffissaqarnerulersitsiniartussaq.

- Siusinnerusukkut pissutsinut sanilliullugu siunnersuutit amerlanerujussuit amerlanertigullu imaannaannginnerujussuit Inatsisartut ullumikkut suliarisalersimavaat. Siunnersuutilli tamakku suliarinissaannut piffissaqarnerulersimanngilagut. Ataatsimiinnermiit ataatsimiinnermut nutaamut arlaatigut tamatta sukkanerusumik arpattaliinnarsimavugut. Tamannalu unammillernartoqarsimavoq qinikkanut sulisunullu, taanna oqarpoq.

Tassa Inatsisartut ukiaq mannamiit ullut ataatsimiiffissaat siulliit septembarip 20-ata novembarillu 21-ata akornanni pissapput, kingornalu februaarip sisamaata tungaanut suliunnaarallariarlutik ulluni katillugit arfineq-marlunni inaarutaasumik ataatsimeeqqissapput.

Sullivinnik Nakkutilliisoqarfimmit isornartorsiorneqartoq

Ataatsimiittarnerannilli aaqqissuusseqqinnissaq pisariaqartoq ukiuni kingullerni paasinarsiartuaarsimavoq.

Tassami Inatsisartut Siulittaasoqarfiat Sullivinnik Nakkutilliisoqarfimmit aasaq juunimi alakkarneqartareerluni isornartorsiorneqarpoq, isumaqarami siulittaasoqarfimmi sulisut suleruppallaartut. Tassa Inatsisartut sulisitsisut allat assigalugit sullivinni atukkat pillugit inatsisinik malittarisassanillu sulisut peqqissusiannik atugarissaarnissaannillu illersuisussanik malinnittussaatitaapput.

Tamannalu Inatsisartut Siulittaasoqarfiata tusaanngitsuusaaginnarsinnaanngikkaa, Mimi Karlsen oqarpoq.

- Inatsisartuni sulisut ukiut ingerlanerini tupinnaannartumik eqaatsumik naatsorsuutigisallu sipporlugit sulisarsimapput, ataatsimiinnerni ulapaarfioqisuni qinikkat suliassaminnik suliaqarsinnaaniassammata. Tamannalu pissutigalugu sulisut qujassutissaqarfigeqaagut – Sullivinnik Nakkutilliisoqarfiulli erseqqilluinnartumik oqariartuutigaa maannamutut ingerlaannarsinnaanngitsugut.

Tassa Inatsisartut ataatsimiittarfianni ataatsimiinnerit sapinngisamik ualikkut sisamanngortinnagu naammassineqareersimasussanngorput. Ataatsimiititalianilu sapaatit akunnerisa naanerini unnukkullu ataatsimiittoqartannginnissaa, Inatsisartunit tamatuma saniatigut aamma anguniarneqarpoq.

Inatsisartut Allattoqarfianni sulinermi atukkat pitsaanngitsut sulisunullu malersuinerit pisartut, Sermitsiaq upernaaq allappoq.

Inatsisartunut qinikkat uippakajaarnermik suliaminnillu tatisimaneqartutut misiginermik peqquteqarlutik ukiuni kingullerni aamma sulinngiffeqarallartariaqarsimasortaqarput.

Inatsisartut ukiakkut ataatsimiinnerat tallimanngorpat septembarip 20-ani aallartissaaq. Tassa Inatsisartunut qinersinissatsinnut naggataamik ataatsimiissapput.