Ilisimatusarfiit nunatta suliffeqarfiini avatangiisit misissuiffigileraat

Ilisimatuut arlallit suliffeqarfinni nunatsinniittuni suliffinni avatangiisinik qanoq pitsanngorsaasoqarsinnaanersut ukiuni marlunni tullerni misissulerpaat.
Nunatta suliffeqarfiisa suliffinni avatangiisit qanoq pitsanngorsarsinnaaneraat Ilisimatusarfiup Syddansk Universitetillu suleqatigiillutik misissulerpaat. Assi © : Grønlands Naturinstitut
marsip 30-at 2021 05:35

Suliffeqarfinni nunatsinniittuni suliffinni avatangiisit ilisimatuutut misissuinermi ukiunik marlunnik sivisussuseqartussami misissuiffigineqalerput.

Nunatta suliffeqarfiisa suliffinni avatangiisit qanoq pitsanngorsarsinnaaneraat Ilisimatusarfiup Syddansk Universitetillu suleqatigiillutik misissulerpaat. Tamatumami misissuiffigineqarnissaa pisariaqartoq ilisimatuut isumaqarput.

Danskit tamatumunnga inatsisaat allanngortinngingajallugu nunatsinni inatsisinngortinneqarsimavoq, nunatsinnili ilumut naleqqunnersoq iluamik misissorneqarnikuunngilaq. Suliniummik aqutsisoq suliffinnilu avatangiisinut Syddansk Universitetimi professori, Peter Hasle, taama nassuiaavoq.

- Pissutsit maannakkut qanoq innersut, Kalaallit Nunaanni suliffeqarfiit suliffinni avatangiisit pillugit qanoq iliortarnersut, suut ajornartorsiutaanersut inatsisitigullu tapersersorneqarnissamut qanoq atorfissaqartitsisoqarnersoq misissuinitsinni paaserusuppagut, Peter Hasle oqarpoq.

Misissuinerup ingerlanerani inerniliussat paasissutissiissutigineqartarumaartut 

Suliffeqarfinni nunatsinniittuni suliffinni avatangiisit pillugit ilisimasaqarneruniarlutik ilaatigut apeqqutinik immersuilluni akisassanik nassiussissapput.

Apeqqutit nunatsinni suliffeqarfinnut ikinnerpaamik qulinik sulisoqartunut tamanut nassiunneqarnissaat anguniagaavoq.

Suliffeqarfiit nunatsinniittut suliffinni avatangiisit pillugit qanoq iliuuseqartigisarnersut, iliuuseqarfigivallaartanngikkunikkillu unammilligassat suunersut taamaaliornikkut paasiniarpaat.

AAMMA ATUARUK Nunarput USA-lu inuussutissarsiornermi ilinniakkanik nutaanik suleqatigiissuteqartut

Tamatuma saniatigut suliffeqarfinnut annernut immikkut misissuissapput.

- Inerniliussassagut kalaallit suliffeqarfiutaannit suliaminnik pitsanngorsaanissamut atorneqarsinnaassasut qularinngilara. Suliffinni ulluinnarni avatangiisit pillugit pitsaanerusumik suliaqarsinnaassapput, taavalu aqutsisut sillimaniarnermillu suliaqartut aalajangigaasa sulisunut tamanut qanoq atuutilersinnaanissaat pikkoriffiginerulissavaat, Peter Hasle oqarpoq.

Suliffeqarfiit sulinermi avatangiisinik qanoq pitsanngorsaasinnaassanerlutik paasisaqarniartut akineqarnissaminnut ukiuni marlunni affarmilu utaqqissanngitsut ilanngullugu nassuiaatigaa.

Misissuinerup ingerlanerani inerniliussat suliffeqarfinnut nalunaarutigineqartarumaartut Peter Haslep erseqqissaatigaa.