Nunarput USA-lu inuussutissarsiornermi ilinniakkanik nutaanik suleqatigiissuteqartut
Attanneqarsinnaasumik takornarialerineq, kiffartuussineq aalisarnermilu aqutsineq.
Taakkua nunatsinni ilinniarfiulersinnaapput. Taakkuami nunatta USA-llu nunatsinni inuussutissarsiornermi ilinniarfiulersinnaasunik nutaanik suleqatigiilerneranni qitiulluinnarput. Suleqatigiissut ukiunik marlunnik sivisussuseqartussaq Arctic Education Alliancemik taavaat.
Suleqatigiissutaata aningaasalersorneqarnera:
USA-p nunanut allanut ministereqarfia 11 millionit koruunit missaannik ukiuni marlunni suleqatigiissutissamut aningaasaliivoq.
Aningaasat taakkua nunatta USA-llu Pituffimmi kiffartuussinissamut isumaqatigiissusiornissamut sinaakkusiorluni ukioq manna oktobarip ulluisa 27-anni isumaqatigiissutaannit aallaaveqarput.
Isumaqatigiissut arlalippaalutsigut suleqatigiilernermik aallarniisuuvoq, ilinniartitaanerlu ilaavoq.
Nunani taakkunani marlunni ilisimatusarfiit inuussutissarsiornermi ilinniarfiit, aalisarnermi aqutsineq attanneqarsinnaasumillu takornarialerineq perpiarlugit suleqatigiinnissaat pingaartinneqarluinnarpoq.
Silap Pissusianik Ilisimatusarfik University of Alaska Fairbanks suleqatigalugu suliniummi
aqutsisuussaaq.
AAMMA ATUARUK Aatsitassalerinermik Ilinniarfimmut 7.5 millioninik aningaasaliisoq
Attanneqarsinnaasumik takornarialerineq, kiffartuussineq aalisarnermilu aqutsineq pillugit nunatsinni ilinniarfiulersinnaasuni amigaataasut suliniuteqarnerup ukiuani siullermi misissorneqassapput.
Silap Pissusianik Ilisimatusarfimmi immikkoortortami aqutsisuugallartoq, Mie Winding, taama oqarpoq.
Taassuma University of Alaska Fairbanksip suleqatigiinnissaa qilanaaraa, ilisimatusarfillu taanna nunap inoqqaavinut tunngasunik suliaqarnermik, kulturilerinernik aalisarnilerinermilu ilisimatusarnermik misilittagaqartuusoq erseqqissaatigalugu. Ilisimasaalu nunatsinni ilinniarfiulersinnaasunik nutaanik misissuillutik suleqatigiinneranni iluaqutaasinnaapput.
- Tassanngaanneertut taakkununnga tunngasunik misissuinermik misilittagaqarluarlutillu Kalaallit Nunaanni ilinniarfiulersinnaasunut nutaanut ikorfartuutaasinnaasunik alaatsinaallaqqissuupput, Mie Winding oqarpoq.
Ilinniartut isumassarsivigeqatigiittassasut
Silap Pissusianik Ilisimatusarfik, Nuummi Pinngortitaleriffimmiittoq, Alaskamilu ilisimatusarfik suleqatigiittutuaassanngillat. Ilisimatusarfimmi, Pensylvania State University Southern Maine Universitylu aamma peqataapput. Nunarput USA-lu suleqatigiinnerminni misilittagaqalerumallutik, ilinniartut paarlaateqatigiittarnissaannik aamma aaqqissuussaqarput. Nunatsinnilu ilinniartut workshopperpaalunni peqataajartorlutik Alaskamukartarnissaat pilersaarutaavoq.
- Ilinniartut paarlaateqatigiittarnissaannut aaqqisuussaq pingaaruteqarluinnarlunilu pissanganarluinnarpoq. Kalaallit Nunaannimi ilinniartut Alaskaliarsinnaassapput, tamaanilu qanoq iliortarnersut takullugit, taavalu ilinniartut amerikamiut nunatsinnukarsinnaallutik, nunani taakkunani marlunni pissutsit alaatsinaannerisigut iluaqutit persaqutillu misissorsinnaallugit, Mie Winding oqarpoq.
