Ilisimasassarsiortut kinguaavisa dronninngi naapikkaat: Pilluartippaatigut

Ataqqinartorsuup Dronning Margrethep aappaata Knud Rasmussenip Thulemi 1921-imi ilisimassarsioqatigisimasaasa kinguaavi Ilulissaniinnermini naapippai.
Dronning, Regine Kristiansen Panigpak Daorana
Regine Kristiansenip Panigpak Daoranallu ataqqinartorsuaq Ilulissani katersugaasivimmi oqaloqatigaat. Assi © : Nukannguaq Geisler
oktobarip 09-at 2021 15:20

Ataqqinartorsuup Dronning Magrethep aappaata nunatsinnut tikeraarnermini ullup tullia Knud Rasmussenip Ilulissani illu inunngorfigisimasaanut pulaarluni aallartippaa.

Knud Rasmussen Thulemi ilisimasassarsiornerup tallimaani 1921-imi siuttuuvoq.

Tamannalu malunnartinniarlugu ilisimasassarsiornermi peqataasut kinguaavi marluk Qaanameersut, Regine Kristiansen Panigpak Daoranalu dronninngip naapippai. Naapitanilu nuannarai.

- Qaanaameersut marluk ilassillugit nuannerpoq, taakkua aamma marluullutik kunngissaq Kalaallit Nunaata avannaani 2000-imi angalammat naapippaat. Nuanneqaaq. Aamma kunngissap taamani misigisai inuttaata inuuneranut pingaarutilerujussuusut paasitippakka. Tamannalu tulluusimaarutigisorujussuuara, ataqqinartorsuaq naapitani pillugit oqarpoq.

Oqaloqatigisaata 83-inik ukiullip, Qaavigarsuaq Mitip paniata inuunermini ataqqinartorsuarmik naapitsinissani takorloorsimanngikkaluarpaa.

Regine Kristiansen
Assi © : Nukanguaq Geisler

Assi: Nukannguaq Geisler

- Pilluarnaq! Ataqqinaq! Inuppalaartoq inuk, nuannersoq. Nuannertumik assut ilassiorpaatigut, uffa ataqqinartuulluni ilaa. Assut pissagagama taamannak pineqarneq ajorama, Regine Kristiansen oqarpoq.

Oqaloqatigereerneranilu nukittortutut misigivoq.

- Puigornavianngilara taanna taamatut pineqarnerput, tupinnaqaaq! Nuanneq. Nukittortippaatigut qiimagami assut. Pilluartippaatigut nuannersumik takutippaatigut ataqqinartorsuulluni. Tuppallernaq.

Nerisassat nuannaarutaasut

Knud Rasmussenikkut taamani angalaneranni umiarsuarmik paarsisup, Nasaitsorluarsuk Daoranap, ernutaa aamma dronninngimik oqaloqateqarpoq.

Kunngikkormiullu Qaanaamiittarnertik akuttunngitsumik oqaluuserisaraat paasigamiuk tuppallertorujussuuvoq.

Panigpak Daorana
Assi © : Nukannguaq Geisler

Assi: Nukannguaq Geisler

- Paasivarput tappavaniittarnitik eqqartortaraat, taavalu aamma tappavani soorlu nerisassat. Dronninngi oqarpoq kiviartornikuulluni mamaralugulu, uanga taanna puigorsinnaanngilara, nuanneq, Panigpak Daorana oqarpoq.

Siuaaminit tusartakkani oqaluttuarisaanermi allassimanngikkaluartut taassuma ataqqinarsortuarmut oqaluttuarai.

Kunngissaq Frederik angalaqataanngikkaluartoq aamma oqaluuserineqarpoq. Taassumami nunatta avannaarsuanut nuannarinninni aamma ilisarnaatigaa. Tamannalu qaanaarmiumut neriullualersitsivoq.

- Assorsuaq siunissamut isumalluarnarpoq kunngissap qitornaminut aamma taanna Qaanaamut uummateqarnertik ingerlateqqissagaa, Panigpak Daorana oqarpoq.

Assi © : Nukannguaq Geisler

Assi: Nukannguaq Geisler