Avannaata Kommuniani eqqakkat mingutsitsisut
Avannaata Kommuniani Uummannami eqqakkat avatangiisinut mingutsitsisartut, soorlu errorsivikut, panersaavikut, kissarsuutit uuliatortut batteerikut allallu immamut sapaatit akunnerata siuliani siaruartinneqarput.
Eqqakkanik siaruarterfiusoq siunissami nunaminertaliassatut pilersaarutigineqartoq siammartiteriffigineqarpoq.
Immallu tarajuata eqqakkat taakku arrortilerpagit pinngortitamut ukiuni tulliuttuni mingutsitsisussaapput. Tamannalu akuersaarneqarsinnaanngitsoq, Uummannami Demokraatineersoq, Inuutersuaq Ulloriaq Løvstrøm isumaqarpoq.
- Ukiorpassuarni eqqakkat tassaniittut takussunartorujussuarmik ingerlapput, maannakkullu iliuuseqarfiginiarsarineqarnerat ajunngikkaluarluni, kisianni pinngortitamut avatangiisimullu mingutsitsisussanngorlutik imaanut nakkaatiinnarneqarneri akueriuminaappoq, taanna oqarpoq nangillunilu:
- Kissarsuutit uuliatortut, errorsivikut, panersiivikut batterikorsuillumi allaat taratsup, immap tarajuisa ukiuni tullerni aasussanngortittussaavaa taamaalillutik pinngortitamut annertuumik mingutsitsineq aallartittussaavoq.
Angallataasivik aamma eqqakkanik eqqorneqarpoq
Umiatsialivik eqqakkanik siammarteriffiusup avannaata tunginnguaniippoq, eqqakkallu aamma umiatsialiviup puttaqutaata ataanut pularalereersut, taanna ilisimatitsivoq. Uummannallu eqqaa aalisartoqarfissuummat, Inuutersuaq Ulloriaq Løvstrømip eqqakkat immamut siaruarterneqarnerat isornartorsiungaatsiarpaa.
- Uummannap sulluani inuussutissarsiutip pingaarnersaat tassaavoq aalisarneq, sullutta iluani inuutissarsiut pingaarneq taamatut kommuniminngaanniit pineqassappat soorunami akueriuminaappoq.
Avannaata Kommuniani Uummannami, Upernavimmi Qaanaamilu eqqakkanik ikuallaaveqanngilaq. Eqqakkallu ikuallanneqarsinnaanngitsut Danmarkimut niuerutigineqartariaqaraluartut Demokraatineersoq isumaqarpoq.
- Ilaatigut Danmarkimi tamakkuninnga eqqaaviit isumaqatigiissuteqarfigalugit ingerlatsisoqarnissaa kaammattuutigivarput, pinngortitamut avatangiisimullu mingutsitsisussanik imaanut nakkaatitsiinnaratik, tamakku naleqarmata ilaatigut millionit sinnerlugit isertitsissutaasinnaammata taavalu atoqqinneqarsinnaallutik aatsinneqarlutik.
Mingutsitsisinnaasut imaaniit peerneqalersut
Avannaata kommuniani teknikkimut ataatsimiititaliami siulittaasoq, Sakio Fleischer, pisumut nassuiaateqarpoq.
Uummannami eqqakkat savimerngit ukiorpassuarni katersorlugit sissamiitinneqarput maannalu siaruartiterneqalersut Sakio Fleischerip oqaatigivaa.
- Erseqqissaassutigilaassavara avatangiisilerisut peqatigalugit siammarterinissaq aaqqiivigineqarsimavoq. Tamakku saviminersuit eqqakkat qaqqajunnarsuanngornikuusut siaartiterneqarput taakkuli avammut nakkaasussanngorlugit suliarineqarnissaa siunertaanngilaq, Sakio Fleischer oqarpoq.
KNR-illi assini pissarsiaani takuneqarsinnaavoq eqqakkat savimerngit nappartakullu imaanut siaruarsimasut.
- Uani ilisimaqqissaanngilara errorsivikut, panersiivikut allallu nakkartinneqarsimaneranut tunngasortai kisianni paasisara naapertorlugu nappartat allallu imaanut nakkarsimasut qaqinniarlugit suliniuteqartoqarnera aallartinneqareerpoq.
Eqqakkat savimerngit aappagu umiarsuarmit aaneqarumaartut, Avannaata kommuniani teknikkimut ataatsimiititaliami siulittaasup ilanngullugu paasissutissiissutigaa.
