Avannaata Kommunia ESANI-mut ilannguteqqissanani aalajangertoq
Avannaata Kommunia kommunit ataatsimoorlutik eqqagassalerinermik ingerlatseqatigiiffiannut, ESANI A/S-mut, 2019-mi ilaasortaajunnaarpoq. Kommuni ilaasortanngoqqissanersoq kommunimi qinikkat taamanimiilli assigiinngitsunik isummerfigisarpaat.
Kommunalbestyrelselu politikkikkut maanna aalajangerpoq.
- Kommunalbestyrelse novembarip 25-anni aalajangerpoq, Esani ilaasortanngorfigineqassanngitsoq, teknikkimut ataatsimiititaliap siulittaasua, Niels Davidsen (IA) oqarpoq.
Esani A/S
- Nunatsinni kommunit tallimat ataatsimoorlutik eqqagassalerinermik ingerlatseqatigiiffik 2019-ip upernaavani pilersippaat, kisianni Avannaata Kommunia qaammatit qulingajaat qaangiuttut ilaasortaajunnaarpoq.
- Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa.
- Tamanna Nunatsinni eqqagassalerinermik pitsaanerulersitsissaaq avatangiisinullu mingutsitsinnginnerulluni.
- 400 millionit koruuninik akeqassaaq.
- Sisimiuni ikuallaavissap nutaap 2022-mi piareernissaa Nuummiittussallu 2023-mi piareernissaa naatsorsuutigineqarpoq.
- Ilulissani, Aasianni, Nuummi, Sisimiuni Qaqortumilu ullumikkut ikuallaaveqarpoq
Tassa imaappoq, nunatsinni kommunit sinnerisa, sisamaasut, ingerlatseqatigiiffimmut piginneqataanerattut Avannaata Kommunia iliornianngilaq.
Sikusartoq
ESANI A/S eqqakkanik passussinermini aalajangersimasumik suleriaaseqassaaq. Tassa Nuummi Sisimiunilu eqqakkanik ikuallaavinnik 2024-mi piareertussanik maanna sanatitsivoq.
Umiarsuaq eqqakkanik illoqarfinnut, assersuutigalugu Tasiilamut Qasiagiannguanullu, ikuallaaviit piareerpata aallertassaaq, eqqakkallu Nuummi Sisimiuniluunniit ikuallaavimmut apuunneqartassapput.
AAMMA ATUARUK Avannaata Kommunia eqqagassat pillugit isummaminik allanngortitseqqilersaartoq
Avannaata Kommunianili, qinikkat tamanna periuseq, najukkaminnut tulluutsinngikkaat, Niels Davidsen oqarpoq. Tamaanimi inoqarfiit avannarpasinnerusumiittut arlallit qaammaterpaalunni sikuusarput, umiarsuarnit imaalitsiaannaq tikinneqarsinnaasaratik.
- Umiarsuup piffissami tassani aallersinnaannginnera pissutaanerpaavoq, Avannaata Kommuniata Esanimut naaggaarneranut, Niels Davidsen oqarpoq.
Nalugaat
Avannaata Kommuniata ESANI A/S-mut piginneqataaleqqissagaluaruni qanoq akeqassanersoq attuumassuteqanngitsunut misissortippa. Kommuni piginneqataaleqqissagaluaruni ataasiartumik 27,6 millionit koruuninik akiliissaaq ukiumullu 3,7 millionit koruuninik ingerlatsinermut aningaaartuuteqartassalluni.
Tamaattoqassanngilarli. Qinikkat kommunip eqqagasat ikuallatassat nammineq isumagisassagai aalajangerput.
AAMMA ATUARUK Avannaata Kommuniani eqqaavilerisut malinnaasinnaanngitsut
Qanorpiarlu tamanna pissanersoq maanna suli paasinarsinngilaq. Tassa qinikkat eqqagassanik qanoq passussisoqartassanersoq suli naluaat. Kommunalbestyrelsemi pilersaarusiortoqaqqaarnissaanik aatsaat aamma aalajangerpoq.
Kommunimi illoqarfiit tamarmik immikkut ikuallaavilersornissaat siunnerfiusoq siulittaasoq oqarpoq.
- Misissuilluta aallartippugut. Ukua ikuallaaviit akuerisat, Ilulissat, Uummannaq, Upernavik Qaanaallu tamakkuninnga pilersornissaannut, Niels Davidsen oqarpoq.
Tippaattartut
Tamannali piviusunngussappat eqqakkanut ikuallaaviit EU-p avatangiisinut akuerisai, pisariaqartinneqarput.
Namminersorlutik Oqartussat silami ikuallaasarneq, EU-llu piumasaqaataanik naapertuutinngitsumik eqqakkanik ikuallaavinni ikuallaasarneq, 2024-mit akuerisarunnaartussaavaat. Ilulissani eqqakkanik maanna ikuallaavik piumasaqaatinik taakkuninnga naammassinnittunik atortulersugaanngilaq.
Kommunimili illoqarfiit tamarmik akuerisanik ikuallaavittaarnissaat ESANI-mut ilanngunnermit aningaasatigut qanoq assigiinngitsiginersoq siulittaasup akisinnaanngilaa.
Assi: Christine Hyldal/ KNR
Avannaata Kommunia 20-t missaanik nunaqarfittaqarpoq. Taakkua eqqagassanik sumi tamaani tippannikunik peqartuartarnerat tusarnartaanngilaq. Taakkunanilu eqqagassalerineq qanoq pitsaanerulissanersoq aalajangiisuusumik suli aamma isummerfigineqanngilaq.
- Nunaqarfiit ikuallaaveeqqanik mikinernik pilersorneqassanersut imaluunniit illoqarfinnut assartorneqassanersut taanna suliassaq suliarineqarpoq, Niels Davidsen oqarpoq.
Akuerisaanngitsut
Avannaata Kommuniani teknikkimik ingerlatsivimmi pisortap KNR-imut allagaa naapetorlugu taakkua kommunimi inoqarfinni tamani ikuallaavilersuisoqassagaluarpat qanoq akeqassanersoq naatsorsuisimapput. Ikuallaaviit pisiarinerat 391,5 millionit koruuneqassaaq, ukiumullu ingerlannerat qaavatigut aamma aningaasartuutaassalluni.
Illoqarfiilli sisamat, nunaqarfillu Kullorsuaq ikuallaavilerneqassappata tamanna 93,2 millionit koruuneqassaaq, saniatigullu ingerlannerat aamma aningaasartuutaassalluni.
AAMMA ATUARUK Kommunit eqqagassaleriffimmik ataatsimoorussamik pilersitsipput
Taakkululi periarfissaq avatangiisinut EU-p piumasaqaataanut naammassinnittuunngitsut, teknikkimut pisortaq, Karl Madsen allappoq.
- Ikuallaaviit taama ittut EU-p piumasaqaataanut 2024-mi atuutilertussanut naapertuutinngitsut, Namminersorlutik Oqartussaniit inernilissaavoq. Taamaattumik akuleriisitsilluni aaqqiissutissanik misissuivugut.
