Avannaata Kommuniani eqqaavilerisut malinnaasinnaanngitsut
Avannaata Kommuniani eqqagassarpassuaqarnera arlaleriarluni tusarfigineqartuartarpoq.
Ikuallaaviit amerlanerpaartaat atorsinnaanngillat. Taamaattumik silami ikuallaanissamut immikkut akuersissut qaammatini pingasuni atuuttoq kommunimi tamani - Ilulissat minillugu, juunip 18-ani pissarsiarineqarpoq.
Tamanna eqqagassarpassuaqarfiusumi, Upernavimmi eqqagassalerinermut ingerlatsisup nuannaarutigaa.
- Qaammatit pingasut taakku sapinngisamik atorluarniassavagut. Immikkut akuersissuteqartoqareersorlu eqqakkat naafferakkaanik ikuallattaratsigit ikiliartulertorput. Eqqaavissuaq ulikkaavikkaluarami, allaat eqqagassat inissaarukkaluarlutik, Nicky Kristiansen, Avannaata Kommuniata nittartagaani oqarpoq.
Ikuallaaviit atorsinnaanngitsut
Avannaata Kommuniani inoqarfinni amerlanerni eqqakkanut ikuallaaveqarpoq, amerlanerpaalli atorsinnaanngillat.
- Upernavimmi ikuallaaveqaraluarpugut, anorili illoqarfiup tungaanut sammigaangat ikuallaavimmi imaluunniit containerini ammasuni eqqakkanik ikuallaasinnaasannginnatta eqqakkanut malinnaasinnaanngilagut. Nunaqarfinni ikuallaaviit amerlanerit ajoquteqarlutik atorsinnaanngimmata silami ikuallaasariaqartarput, Nicky Kristiansen oqarpoq.
Avannaata Kommunia eqqagassalerinermut piginneqatigiiffimmit ESANI a/s-imit 2019-imi peqataajunnaarnikuuvoq, maanna eqqagassalerinermik aaqqiissutissarsiulertoq teknikkeqarnermut ingerlatsivimmi pisortaq nassuiaavoq.
- Ikuallaavinnik mikinernik atoqqiisinnaanermillu periarfissanik ilaatigut ujartuinertaqarpoq. Avannaata Kommunianilu tamarmi atuuttumik aaqqiissutissarsisoqareerpat aatsaat kommune silami ikuallaasarnissamut immikkut akuersissuteqartarnissamik pisariaqartitsiunnaassaaq, Karl Madsen oqarpoq.
Qinikkat malunnaatilimmik iliuuseqarusuttut
Avannaata Kommuniani qinikkat suleqatigiinnissamut isumaqatigiissummik atsioqatigiinnikut pingaarnertut suliniutaannut eqqaaveqarneq ilaavoq.
- Nunaqarfinni eqqaavissuarnik anartarfeqarnermilu ingerlatsinerit akuersaaginnarunnaarpagut, takussutissalimmik iluarsartuussinerit qiningaaffik naatinnagu malunnaatilimmik inerisaavigineqarsimassapput kiisalu sulisunut atugassarisaasut pitsanngorsaavigineqarlutik, politikkikkut suleqatigiit isumaqatigiissumminni taama allapput.
