Avannaata Kommunia eqqagassat pillugit isummaminik allanngortitseqqilersaartoq
- Uanga nammineerlunga Esanimut ilaasortanngoqqinnissaq takorloorpara. Kisianni kommunalbestyrelsip naggataarutaasumik isummerfigisussaassuaa, Inuit Ataqatigiinneersoq Niels Davidsen KNR-mut oqarpoq.
Kommunimut qinikkat tamarmik qaqugu oqaluuserissaneraat suli ullulerneqanngilaq. Siulittaasorli naapertorlugu teknikkimut ataatsimiititaliap ulluni qaninnerni oqaluuserissavaa.
Isuma mumeqqittoq
Avannaata Kommunia ESANI A/S-imit 2019-imi anivoq. Kommunalbestyrelsi peqataaneq akisuallaartoq taamani isumaqarpoq. Isumali tamanna maanna mumilluinnarpasilerpoq.
Ataatsimiititaliap siulittaasua naapertorlugu kommunimi inoqarfiit 25-t missaanniittut tamarmik akuerisanik ikuallaavilersornissaat ESANI-mut ilaasortaanermit akisuneruvoq.
AAMMA ATUARUK Avannaata Kommuniani eqqaavilerisut malinnaasinnaanngitsut
Avannaata Kommunia Esani A/S-mut ilaasortanngoqqissaguni 2024 nallertinnagu 10 millionit koruuninik akiliissaaq. 2024-miillu ukiumut atuinermut 3.3 millionit koruuninik aningaasartuuteqassalluni. Eqqagassat illoqarfinnit Nuummi Sisimiunilu ikuallaaviliaannerat ukiumut atuinermut ilaavoq.
Nunaqarfinnit illoqarfinnukaanneqartassasut
Kommuni 20-t missaannik nunaqarfeqarpoq. Eqqagassat ikuallaaveqarfiliaatinnginneranni nunaqarfinnit illoqarfinnukaannerat kommunip akisussaaffigissavaa. Taakkuali qanoq poortorlugillu assartorneqartarnissaat siulittaasup akissutissaqartinngilaa, taamaattorli neriuuteqarpoq.
- Neriuutigaara 2024-minngaanniit tassa eqqagassat tamaavimmik Sisimiunut Nuummulluunniit assartorneqartalissasut, taakkunanilu illoqarfinni ikuallanneqarlutik, Niels Davidsen oqarpoq.
AAMMA ATUARUK ESANI A/S-ip ikuallaaviliornissamut aningaasaliissutissat qulakkeerai
Kommunip avannarpasissortaa, assersuutigalugu Qaanaaq ukiumut qaammatini amerlanerusuni imaatigut umiarsuarnik angallavissaanani sikuusarpoq. Eqqagassat Qaanaami ukiuunerani katersorneqartarnissaat, ukiumullu marloriarluni umiarsuarmit aasakkut aaneqartarnissaat pilersaarutaasoq, Niels Davidsen oqarpoq.
Atassummit ataatsimiititaliami ilaasortaatitaap isuma tapersersinnaallugu, ataatsimiititaliamili oqaluusereqqaarusullugu oqaatigaa. Siumuminngaanniit ataatsimiititaliami suli eqqartunnginnamikku isummerfiginngilaat.
