Ataatsimiititaliaq naalakkersuisumik isornartorsiuisoq

Inatsisartut nunanut allanut tunngasunut ataatsimiititaliaanni amerlanerussuteqartut nunanut allanut naalakkersuisoq, Vivian Motzfeldt, isornartorsiorpaat.

Ataatsimiititaliaq nammineerluni taama nalunaaruteqarpoq.

- Nunanut allanut sillimaniarnermullu ataatsimiititaliami ilaasortat amerlanerussutillit nunanut allanut ilisimatusarnermullu naalakkersuisumik suleqateqarniarneq kipiluttunarivaat, ataatsimiititaliaq allappoq.

Inatsisartut allakkatigut apeqquteqaataat paragraf 37 malillugu apeqquteqaatinik taaneqartartut ilaannikkut qaammatini arlalinni akiniarneqartarneri tamatumunnga pissutaaqataavoq.

Apeqqutit taakku annerusumik misissuiffiusussaanngikkaangamik ulluni qulini suliffiusuni akineqartartussaasut Inatsisartut nittartagaanni atuarneqarsinnaavoq.

Aamma ataatsimiititaliap apeqqutai qaammatini arlalinni akineqarneq ajortut ataatsimiititaliaq allappoq.

- Tamanna Inatsisartutut sulinermi ilungersunartutut ataatsimiititaliami ilaasortanit amerlanerussuteqartunit nalunaarutigineqarpoq, ataatsimiititaliaq allappoq.

Illersornissamut isumaqatigiissutip immikkoortuata aappaa ukiaq saqqummiunneqarmat, borgmesterit Inatsisartunilu ilaasortat peqataatinneqarnatik misigigamik naalakkersuisumik isornartorsiuipput.

Inuillu sinniisorerusutaminnik qinersisarmata, qinikkat isumaasa suliani annerni ilaatinnissaat pingaaruteqartoq, Inuit Ataqatigiinneersoq Pipaluk Lynge isumaqarpoq.

- Naalakkersuisoq qanoq isumaqaraluaruniluunniit oqartussaaqataaneq tamakkiisoq atuutsissaguniuk taava Inatsisartunut ilaasortat borgmesterillu naalaarnissaat pisariaqarpoq, Pipaluk Lynge oqarpoq. 

Taanna nunanut allanut sillimaniarnermullu ataatsimiititaliami siulittaasuuvoq, KNR-illi oqaloqatigimmagu, ataatsimiititaliamut siulittaasuunngitsutut Inatsisartunili ilaasortatut oqaaseqarluni erseqqissaatigaa.

Vivian Motzfeldtimik attaveqarnerunissaq sivitsortumik kissaatigisarsimallugu oqaatigaa.

- Taanna ukioq manna kipiluttunarpoq. Taamaattumik aqqutit tamaviisa misilereerlugit siunersiortariaqalersimavarput, Pipaluk Lynge oqarpoq.

Pipaluk Lyngep Vivian Motzfeldtillu partiivi naalakkersuisoqatigiipput. Taamaammat taama isornartorsiuinissaq imaannaanngitsorujussuusoq, tamannalu naalakkersuisuminngaanniit ilungersunartutut tiguneqarnissaa Inuit Ataqatigiinnit naatsorsuutigalugu Pipaluk Lynge oqarpoq.

Nalorniffiunngitsumillu ataatsimoorussaqarsinnaanissaq nunarsuarmi pissutsit nalorninartorsiorfiuneranni pingaaruteqartoq, Pipaluk Lynge isumaqarpoq.

Vivian Motzfeldtilu Sermitsiaq.AG-mit  apersorneqarluni ataatsimiititaliamut utoqqatsissuteqarpoq, ataatsimiititaliarlu sulinini pillugu ilisimatittuarumaarlugu neriorsuuteqarluni. 

Taamalu akinera Pipaluk Lyngep naammagisimaarpaa.