Innaallagiaq imerlu ukiumi nutaami akitsussasut
Nukissiorfiit innaallagissamik imermillu tunisassiarineqarneranit akikinnerusumik ukiuni arlalinni pilersuipput. Tamanna Naalakkersuisut oqarnerat naapertorlugu ukiut tamaasa aningaasatigut kinguleruttooruteqarujussuariartuinnarnermik kinguneqarpoq. Taamaammat akit ukiuni tulliuttuni pingasuni ukiumut 7 procentimik ilaneqartassapput . Naalakkersuisut tusagassiuutinut nalunaarummi allapput.
Aningaasaqarnerup pitsaannginnerata kingunerisaanik Nukissiorfinni maskiinat, illuutit kiisalu inaallagissamik, imermik kiassarnermillu pilersuinermut aqqutit naammattumik aserfallatsaaliorneqannginnerannik kinguneqarpoq. Naalakkersuisut aalajangerneq nunatsinni attaveqaatinik pingaarutilinnik ingerlatsinissamut qulakkeerinissamut pisariaqarnerarpaat.
Nukissiorfiit pisortaata, Johan Danielsenip akinik naleqqussaaneq patajaatsumik pilersuinissamik qulakkeerissasoq aamma erseqqissaatigaa:
- Massakkut akinik aaqqiinerput uatsinnut sullitatsinnullu avissaanganerulernissaq siunertaanngilaq, attaveqaasersuutilli inuiaqatigiit tamarmik pinngitsoorsinnaanngisaasa paarilluarnissaat pineqarpoq, taanna Nukissiorfinnit tusagassiuutinut nalunaarummi oqarpoq.
Imermut innaallagissamullu akit 2026-mi januaarip aallaqqaataanni, 2027-mi aamma 2028-mi 7 procentimik akitsussapput.
Inoqutigiinni nalinginnaasumik atuinermi 700 koruuninik akiliisoqarnerussasoq
Nukissiorfiit 2026-mi ilasinermit aserfallatsaaliuinermut aamma sanaartukkanik taarsiinissamut atugassaminnik 37 millionit koruuninik isertitaqarnissartik naatsorsuutigaat.
Inoqutigiinni nalinginnaasuni innaallagissamik atuineq agguaqatigiissillugu 3.500 kWh-iuvoq, imermillu atuineq 150 kubikmeteriulluni taakku tamanna ukiumut 700 koruunit missaannik – tassa qaammammut 60 koruunit missaannik akisunerulissaaq.
| 1. januar 2026-imit akit | 1. januar 2027-imit akit | 1. januar 2028-akit | |
|---|---|---|---|
| Innaallagiaq | 2,00 kr. /kWh | 2,14 kr /kWh | 2,29 kr. /kWh |
| Imeq | 24,30 /m3 | 26,00 /m3 | 27,83 /m3 |
Akinut iluarsiissutissat akiligassiissummi atuisut februaarip qaammataani pissarsiassaanni allassimassapput, tassani januaarip qaammataani atuisimanermik nalunaarsuisimaneq takuneqarsinnaassaaq.
Naak akinik akitsuineq atuisartuni ernumalersitsisinnaagaluartoq, tamanna siunissami ajornartorsiutaalersussanik pinngitsoortitsiniarnissamut pisariaqartoq, Nukissiorfinni pisortap, Johan Danielsenip erseqqissaatigaa.
- Nalunngilara akinik allannguineq ernumalersitsisinnaasoq, tamannalu ilungersunartutut isigaarput. Kisianni allannguinissamut alloriartariaqarpugut, matumanilu qamittooqattaarnerit patajaatsumillu pilersuisinnaanerup attatiinnarnissaanut qulakkeerniarlugu aningaasaliinissat pisariaqavissut kinguartinneqaqattaarneqarunnaartariaqarpoq.
Innuttaasut akitsiuinerup kingunerisaanik aningaasatigut ajornartorsiuteqalersut kommuniminnut saaffiginninnissaat Naalakkersuisunit kaammattuutigineqarpoq. Innuttaasut kommunip aggulussimanerisa avataanni najugaqartut Isumaginninnermut, Suliffeqarnermut Nunamullu Namminermut Naalakkersuisoqarfimmut saaffiginnissinnaapput.
