Ilinniartut ilinniartitaaneq pillugu Qaanaami nittarsaassisut
Ilinniartitaaneq pillugu saqqummiinermi ilagaatigut inuusuttut ilinniarusussuseqalernissaanik anguniagaqarneruvoq.
- Inuusuttut akornanni ilinniaqqinneq atugaavallaanngilaq. Massakkut Qaanaami imaappoq meeqqat atuarfianinngaaniit ingerlaqqittartut ikitsuaraallutik, taamaalillutillu suliffissaaleqisut aamma arlaqarlutik, Tukumminnguaq Nykjær Olsen oqarpoq.
Taanna Ilisimatusarfimmi ilinniartoqatini Masauna Peary peqatigalugu ilinniarneq pillugu saqqummersitsineq piareersarpaat.
Taakku saqqummiinermini ilaatigut oqaluttuarissavaat najugaqarfimmiit ungasissumut ilinniariartorluni qanoq innersoq, tamannalu nangiarineqartariaqanngitsoq.
AAMMA ATUARUK Min uddannelse giver mig et mål for fremtiden
- Tassani aamma pingaartissimavarput inuusuttumiit inuusuttoqammut, Qaanaarmioqammiit Qaanaarmioqammut inuusuttut saqqummiissasut. Oqariartuutigalugu aamma avinngarusimasuminngaaneeraluarluni ilinniagaqarnissamut unammillernartoqaraluaqisoq ajornartoqanngilaq, Tukumminnguaq Nykjær Olsen oqarpoq.
Ilinniarneq pillugu saqquumiinissaq ilinniarfinnit assigiinngitsunit tassa ilinniarnertuunngorniarfinnit, perorsaanermi ilinniarfimmiit, saviminilerinermi ilinniarfimmiit, niuernermi ilinniarfimmiit, peqqissaanermi ilinniarfimmiit teologinngorniarnillu peqataaffigineqassaaq.
Suliniut Tips og Lottomit Thulefondenimiillu aningaasaliiffigineqarpoq.
AAMMA ATUARUK Kalaallit amerlanerusut ilinniarnertuunngorniartalersut
