VIDEO Ilinniartitsinerup pitsaassusaa pingaartinneqartoq

Namminersorlutik Oqartussat Nuummi suliffiutaasa 600-t sinerissami illoqarfinnut allanut nuunneqarnissaannut pilersaarummut atatillugu ilinniarfiit sisamat illoqarfinnut allanut nuutsinniarneqarput.

Taama pilersaaruteqarneq Kommune Kujalliup, Qeqqata Kommuniata Qaasuitsullu Kommuniata borgmesteriisa sinerissami illoqarfiit naligiinnerunissaannik siorna kissaateqarnerannit aallaaveqarpoq.

Tamanna Ilisimatusarfimmit ernumanartoqartinneqarpoq.

Ilinniarfiilli nuunneqassanersut suli aalajangerneqanngitsoq, ilinniartitaanermut naalakkersuisup, Doris Jakobsenip oqaatigaa.

- Taanna maannakkut aalajangerneqarnikuunngilaq, kisianni taakkunanit kommuninit pingasuninngaanniit siunnersuutigineqarpoq. Taavalu aamma ataqatigiissaarisoqatigiit aalajangernikuupput, kingunissai misissorneqassasut, Doris Jakobsen oqarpoq.

Sinerissamili ineriartortitsinissaq pingaartillugu oqarpoq.

- Kisianni sinerissami ineriartortitsinissatsinnut politikkikkut akisussaaffeqartugut isumaqarpunga. Aamma ilinniartitaanermi, Doris Jakobsen oqarpoq.

Ilinniarfinnilli nuussinissamik pilersaarutit ilisimatusarfimmit ernummatigineqarput.

Sulisut ilaat nooqataarusussanngimmata ilisimasanik annaasaqartoqassasoq, suliffeqarfiillu illoqarfinni minnerusuniittut ilinniartuuteqarsinnaanerat killeqartoq, ilisimatusarfimmit oqaatigineqarpoq.

Doris Jakobsenili naapertorlugu, nuussinerup ilinniarfinnut kingunerisinnaasai maanna misissorneqarput. Ilinniartitsinerullu pitsaassusaa pingaartinneqartoq oqaatigaa.

- Uanga naalakkersuisutut pingaartilluinnarpara ilinniartitaanerup qaffasissutsimigut appartinneqannginnissaa. Tamannalu aamma pingaartillugu qulakkeerniartussaavarput, Doris Jakobsen Qanoruumut oqarpoq, ilanngullugulu oqarluni ilinniarfiit nuunneqarnissaat Inatsisartunit aalajangerneqarumaartoq.