IMAK: Ilinniarsimasunik amigaateqarpugut

Kommuneqarfik Sermersuumi ilinniartitsisut aasaru atuanngiffeqarnerup kingorna tuluttut ilinniartitsisalernissaminnut paasitinneqarsimanngillat.

- Uagut ilisimatinneqarnikuunngilagut qanoq iliuuseqartoqarniarnersoq aamma Kommuneqarfik Sermersuumi ilinniartitsisuusut ulluinnarni taakkua ilinniartitsisunngortussat aamma apersumissaarnikuuakka taakkualu aamma oqaaseqarput arlaannaanilluunniit tusagaqarsimanatik, IMAK-imi siulittaasoq Karl Frederik Danielsen taama oqarpoq.

AAMMA ATUARUK Tuluit oqaasii takornartat oqaasiini sallersanngornissaannut piareersimanngilagut

Taamatullu paasitinneqarnikuunnginnamik tiimit sumut aaniarneqarnersut naluaat.

- Tiimi una aallartittoq tuluttut atuartitsineq aallartippat taava suummita tiimikinnerusumik atuartitsissutigineqartalerniarpataava? Karl Frederik Danielsen taama oqarpoq.

Kommuneqarfik Sermersuumi Meeqqanut Atuarfeqarnermullu Ataatsimiititaliami siulittaasup Nivi Olsenip oqarnera naapertorlugu ilinniartitsisunik amigaateqartoqanngimmat ernumanartoqanngilaq.

IMAK ernumaqartoqarpoq

Akerlianilli nunaqarfinni isorliunerusuni tamanna isumannaarneqarnikuunngitsoq IMAK-ip siulittaasuata oqaatigaa.

- Oqaatsit pillugi ilinniarsimanani oqaatsinik allanik ilinniartitsinialeraanni taava eqqarsaat ajunngitsoq killormut ingerlalersinnaammat imatut eqqarsaat ajunnikkaluartoq tuluttut inatsit malillugu ingerlaniarpugut kisianni ilinniartitsisussaaleqiffiusuni tamakkunani ilinniartitsisinnaannitsunik immaqa pitsaavallaanngitsup tungaanut aallartoqarsinnaanera ernumanarsinnaammat, IMAK-imi siulittaasoq Karl Frederik Danielsen ima oqarpoq.