Nivi Olsen: Oqaatsinik ilinniarnissaq pingaaruteqarpoq

Aasaru atuanngiffeqareernermi meeqqat atualerlaat tuluttut oqalunneq allannerlu ilinniartalissavaat.
- Pingaaruteqarsigaluttuinnarpoq ullutsinni meeqqagut allanik oqaatsinik nunarsuarmiooqataanitsinnik atorsinnaasanik piginnaasaqarnissaat, Kommuneqarfik Sermersuumi Meeqqanut Atuarfeqarnermullu Ataatsimiititaliami siulittaasoq Demokraatuneersoq Nivi Olsen taama oqarpoq.

Meeqqat atuarfianni tuluttut aturneq klassit sisamaanniit ullumi aallartittarpoq, tamannalu kingusippallaartoq Kommuneqarfik Sermersuumi amerlanerussuteqartut isumaqarput.

Oqaatsit takornartat pisariaqarput

Nunatsinni meeqqat nunatta inukeqisup nunarsuarmut ilaanera ilisimaarinerulerniassammassuk, takornartat oqaasiinik oqalussinnaanngornissaat Nivi Olsenip neriuutigaa, 

- Ingammik una paasitikkusunnarnermut meeqqatsinnut suli mikineranni takutissallutigu paasitissallutigulu qanoq pingaartuteqartigisoq oqaatsinik allanik piginnaasaqarnissaq, Nivi Olsen taama oqarpoq.

Meeqqat atuarfianni qallunaat oqaasii, atuartunut amerlanerpaanut takornartaat oqaaserisaat, 1. klassemi ullumikkut ilinniarneqartarput.

Taamaakkaluartoq atuartunut oqaatsinik allanik aamma ilinniaqqinnissaq saniatigut akornutaanavianngitsoq, Nivi Olsen isumaqarpoq. 

Taannami isumaqarpoq, erinarsorlutillu kisitsillutik oqaatsinik allanik ilinnialiaarunik ajoqutiginavianngikkaat.

Ilinniartitsisussaqarpugut

Ilinniartitsisut sulinerannut faginullu allanut akornutaassanngitsoq, nunaqarfinnilu isorliunerusuni ilinniartitsisussaaleqinavianngitsoq Nivi Olsen nassuiaavoq.

- Inuit pikkorissut ilinniartitsisut kommuneqarfik sermersuumi pigineqareersut atorneqarsasut paasitinneqarpunga, taamaattumik amigaateqarnissaq immaqaluunniit nutaanik ujartuinissaq pisariaqanngitsoq uani paasitinneqarnikuuvunga, Kommuneqarfik Sermersuumi Meeqqanut Atuarfeqarnermullu Ataatsimiitutami siulittaasoq Nivi Olsen taama oqarpoq.