Ilinniarfissuaq isornartorsiutinut akissuteqartoq

Ilinniartitsisunngorniarfimmi ilinniartut ilinniarsimasullu ilinniartitsisuunissaminnut piareersimannginnermik aarleqquteqarnertik sapaatip akunnerata siuliani oqaluttuaraat. Ilinniartitsinermik Ilisimatusarfimmit isornartorsiutinut maanna akissuteqarput.
Britta Lohmann
Britta Lohmann Ilinniartitsinermik Ilisimatusarfimmi pisortaavoq. Taanna isumaqarpoq ilinniartitsisut sulilernissaannut ilisimatusarfimmit sapinngisamik pitsaanerpaamik piareersarniarneqartartut. Asseq: KNR 
Allattoq Mette Nørmark
marsip 26-at 2019 08:32
Nutserisoq Ivik Kristiansen

Ilinniartitsisut kattuffiata ilinniartut tapersersorpai. Ilinniartitsisummi illoqarfinni minnerusuni atuarfinni sulileraangamik tupattartut, IMAK-ip siulittaasua, Birthe Møller Therkildsen oqarpoq.

- Illoqarfinnut mikinerusunut ingammik piffinnut mikinerusunut pigaangamik, piviusumut pigaangamik uissuummillutillu tupallutillu pisarput, Birthe Møller Therkildsen taama oqarpoq, nangillunilu.

- Ilinniartitsisutut atuarnerminni ilinniarfigisimasamik piviusuatalu assigiinngittarnerat tassani takuneqarsinnaavoq, soorlu assersuutigalugu angajoqqaanik suleqateqarneq, meeqqat immikkut pisariaqartitsisut qanoq atuartinnissaannut ilinniarluarsimannginneq tassani aamma takuneqarsinnaasarpoq.

Ilinniartitsisunngorniartullu tupassinnaasartut Ilinniartitsinermik Ilisimatusarfiup pisortaata, Britta Lohmannip, nassuerutigaa.

AAMMA ATUARUK Ilinniartitsisunngorniartut piviusumiilernissamut ernumasut

 

Kommunini ilinniartitsisut ima amerlatigisut amigaatigineqarput
- Avannaata Kommunia: Ilinniartitsisut 18-it
- Kommune Qeqertalik: Ilinniartitsisunit 102-sussanit 18-it amigaatigineqarput
- Qeqqata Kommunia: Kisitsitsinik pissarsisinnaasimanngilagut
- Kommuneqarfik Sermersooq: Ilinniartitsisunit 329-sussanit 27-t amigaatigineqarput
- Kommune Kujalleq: Ilinniartitsisunit 102-sussanit 23-t amigaatigineqarput.  

Ilinniartitsisunngorniarfimmiilli ilinniartut sapinngisamik piareersarniarsarisaraat, Britta Lohmann isumaqarpoq.

- Sakkussaannik atorfissaqartitaasorisatsinnik tunisarpagut, aamma praktikkertarput, ilinniakkatillu misilissinnaallutigit. Taava praktikkernerisa sivisussusaat naammannersoq imaluunniit allamik misiliissanersut oqaluuserineqarsinnaavoq, Britta Lohmann oqarpoq.

 

Praktikkerneq nutaaq

Ilinniartut sulilernissaminnut piareersimaneruniassammata ilinniarnerup nutaamik aaqqissugaanissaa Ilinniartitsinermik Ilisimatusarfiup 2018-imi akuersissutigaa.

Ilaatigut praktikkernermik nutaamik ilusilimmik aallartitsipput.

AAMMA ATUARUK Ajornartorsiuteqarpallaarpoq Nuullu qimakkuminaalluni

- Ilinniartitsisumik malittaqarimmik taallugu aaqqissuussamik immikkut praktikkertariaaseqarpugut. Tassalu ilinniartitsisunut piviusoq ilinniartunut takutinniarlugu ilinniartitsisumut ataatsimut attaveqartitsineq. Nammineq praktikkerneq ajorput, kisianni ilinniartitsisumik malinnaallutik ilinniartarput. Aaqqissuussap sunniuteqarujussuarnissaa neriuutigaarput, Britta Lohmann oqarpoq.

IMAK-imik suleqateqarneq

Aamma IMAK-imik suleqateqarneq ilinniartunut iluaqutaassasoq, Britta Lohmann oqarpoq.

- Ajornartorsiutit allamit isigisarmassuk. Taamaammat immitsinnut tusarnaassasugut uanga isumaqarpunga. Sakkut suut atorfissaqartinneqarpat, imaluunniit ilinniaqqinnermik atorfissaqartitsisoqarpa? Pikkorissarnerit sakkullu suut ilinniartitsisunngorlaat atorfissaqartippaat, Britta Lohmann oqarpoq.

KNR-ip misissuinera naapertorlugu ilinniartitsisut 100-t kommunini tallimani maannakkut amigaatigineqarput.