Ikiueqqaarnermut nersornaaserneqartut: Ikinngutitsinnut ikiuussinnaanerput qujamasuutigaarput
Henni Pedersen Ilisimatusarfimmi isumaginninnermi siunnersortinngorniartuuvoq. Taassuma ikinngutaa Aputsiaq siorna novembarimi tassanngaannartumik uppippoq.
Qimmip illumiittup arlaannik susoqarnera malugisinnaasimavaa, qimmillu Hennip taassumalu ikinngutaata Carolinep siniffigisaanut ineeqqamut matu kukkilaffigisimallugu.
- Qimmeq ineeqqamut isertoq iterpugut, Aputsiarlu suaartartoq tusaasinnaallutigu. Kisianni oqaatsit atorlugit suaartanngilaq. Aputsiap natermi nalaffigisaanut paarlermukapallappugut, Henni Pedersen KNR-imut oqarpoq.
Aputsiaq natermi nalalluni oqalussinnaanngilaq, oqaalu malugisaqarani timaa talerperleq nukillaarsimavoq.
Ikinngut taamaattoq takullugu nuanninngitsoq
Hennip ikinngummilu Carolinep Aputsiaq majuartarfikkut nakkakattarsimasoreqqaaraluarpaat, arlaatigullu nissumigut talimigulluunniit napisimasorigaluarlugu, oqalussinnaannginneralu tupaqqaneranik pissuteqarsorisimagaluarlugu.
- Nalinginnaasumik nuannaartumik inuummarittumillu tassanngaannartumik oqalussinnaajunnaartumik takulluni nuanninngilaq. Tupannartorujussuuvoq, Henni oqarpoq.
Tamatuma kingorna ambulancenut sianerput tulleriiaallutillu Aputsiap sanianiillutik eqqissisaallutik, aappaalu ambulancep takkunnissaanut alaatsinaalluni.
AAMMA ATUARUK Caroline Hennilu ikiueqqaarnermut nersornaaserneqartut: Aputsiaq taqqakkut milittoormat ikioraat
- Saniani issianissaq eqqissillunilu najornissaa qitiatigullu tatigartuutigalugu anersaartornissaanik pisullu qaangiunnissaanik oqaluunnissaa pingaaruteqarsoraara.
Nassuiaruminaatsumik qujamasuttoq
Taakkulu iliuuseqarnerat pissutaalluni ikinngutaat ajunngilaq. Tamannalu Hennip nuannaarutigeqaa:
- Ulloq taannarpiaq tassaniissimanerput nassuiaruminaatsumik qujamasuutigaara. Ullumikkut uummaarillunilu qanoq innermisut ileqqinnikuuvoq.
Hennittaat Kalaallit Røde Korsianit ikiueqqaarnermut nersornaaserneqarnertik nuannaarutigaa.
- Taama naatsorsuuteqanngilluinnaraluarpunga, tupaallannaqaaq. Kalaallit Røde Korsiat taama iliuuseqartarmat nuannaarutigaara, Henni Pedersen oqarpoq.
Qimmeq Rico Henni Pedersenimit aamma Caroline Hartmann Hansenimit aamma qujaffigineqarpoq. Taakku nersornaaserneqarnerminni 10.000 koruuninik avitassaminik aamma tunineqarput. Aningaasallu Ricop mamarisaanut ilaatigut atorneqarneqassapput.
- Uanga, Carolinep Aputsiallu Ricop najuussimanera nuannaarutigaarput. Taassumami Aputsiaq ilagaa malugisinnaasimallugulu arlaannik ajortoqartoq. Mamarisaanik uatsinniit tunineqassaaq, Henni oqarpoq.