Caroline Hennilu ikiueqqaarnermut nersornaaserneqartut: Aputsiaq taqqakkut milittoormat ikioraat

19-inik ukiulik Aputsiaq Nuummi uppippoq. Uffaqqammerluni taqqamikkut milittoorpoq. Timimi illuatungaa atorsinnaajunnaariataarlugulu oqalussinnaajunnaarpoq. 

Taamaattumik ikioqqulluni aamma suaartarsinnaanngilaq. Qimmilli illumiittup Aputsiaq ikiortariaqartoq malugimmagu sinittarfimmut matu kukkilalerpaa. 

21-nik ukiullit Caroline Hartmann Hansen Henni Pedersenilu sinittarfimmi sinipput. Taakku Aputsiap ilaqutaannut ikinngutaapput. Iteramik Aputsiaq ikioqqulluni nimaartoq tusaavaat.

Aputsiaq natermiittoq nanimmassuk apersorpaat, Aputsiarlu sikiimilluni akisinnaavoq. Tamatuma kingorna ambulancenik aggersaaniarlutik sianerput. Kalaallit Røde Korsiat taama ilisimatitsivoq.

10.000 koruuninik avitassaminnik akissarsititaasut

Kalaallit Røde Korsiat naapertorlugu Aputsiaq massakkut ajunngilaq. Caroline Hartmann Hansen Henni Pedersenilu Ikiueqqaarnermut Ataatsimiititaliamit 2019-imi ikiueqqaarnermut nersornaaserneqarput.

- Iliuuseqalertupallannerat Aputsiap anniaateqarujussuannginneranik timikkullu ajoquteqalinnginneranik kinguneqartoq, Kalaallit Røde Korsiat ilisimatitsivoq.  

AAMMA ATUARUK Kalaallit Røde Korsiat tarnikkut ikiueqqaarsinnaalersoq

- Arnat taakku 21-inik ukiullit ikiueqqaarnermut nersornaasissallugit toqqarpavut, nersornaallu 10.000 kr-inik aningaasartalik avissagaat aalajangerlugu, Ikiueqqaarnermut Ataatsimiititaliap siulittaasua Julie S. Bendtsen itisiliivoq.

- Alaatsinaalluarlutik, pilertortumik naleqquttumillu iliuuseqarnertik tamatumalu ilutigisaanik Aputsiap anniaateqarujussuannginneranik kinguneqartumik annaassinertik pillugit ikiueqqaarnermut nersornaaserpavut.  

Innuttaasut affaat ikiueqqaarsinnaasariaqartut

Caroline Hartmann Hansen Henni Pedersenilu eqqissisimallutik alaatsinaalluarlutillu ikiueqqaarnerat allat taamaaliornissaannut kajumissisitsisinnaasoq, Kalaallit Røde Korsiat isumaqarpoq. 

- Inuiaqatigiinni aamma inuusuttut ikiueqqaarnermik ilisimansaqarnissaat taamaalillutillu ajutoortoqartillugu pingaaruteqarluinnartumik iliuuseqarsinnaanissaat pingaaruteqaqaaq, Julie S. Bendtsen oqarpoq.

Nunatsinni innuttaasut affaat inunnik nakorsanit imaaliallaannaq ikiorneqarsinnaanngitsunik ikiueqqaarsinnaanissaat, Kalaallit Røde Korsiata anguniagaraa.

Taamaattumik Kalaallit Røde Korsiat 10.000 koruuninik aningaasartalimmik ukiut tamaasa ikiueqqaarnermut nersornaasiisarpoq.