Ikiaroornartut sakkortuut nunatsinni ernumassutigineqartut

Ikiaroornartut sakkortuut qanoq atorneqartiginerannut ilisimasat killeqarput, naammattuukkallu maannamut ikittuinnaapput.

Ataasiakkaalli katsorsartinniarlutik Allorfimmut saaffiginnittarput.

- Pinngitsuuisinnaajunnaarsimanermut katsorsartikkusuttut ukiuni kingullerni marlussunni ukiumut ataasiunngikkuni marluk saaffiginnittarput. Taakku assersuutigalugu kokainimut tunngassuteqarput, Allorfimmi nakorsatut siunnersorti Efraim Jessen Olsen oqarpoq.

Inuit ikiaroornartumik atornerluinermik Danmarkimiinnerminni ajornartorsiuteqalersimasoorpasittartut, taassuma erseqqissaatigaa.

Kisianni aamma ikiaroornartunik sakkortuunik nunatsinni atuisoqartarpasippoq. Ataasiakkaanik ikiaroornartunik sakkortuunik atuisimatillutik napparsimmavinniittoqartartoq, Efraim Jessen Olsen nassuiaavoq.

- Kokain atorneqartalersimarpasippoq. Taava ikiaroornartut allat, soorlu morfinimut stesolidinullu assingusut atorneqalaartarpasipput. Kisianni oqareernittut taakku ataasiakkaaginnaapput.

Tassalu ikiaroornartut sakkortuut ullumikkut takussaangaanngillat.

Politiet ikiaroornartunik sakkortuunik arsaarinnissuteqartartut

Ajornartorsiutaavorli, annerujartornissaalu nakorsat ernummatigigaat, Efraim Jessen Olsen oqarpoq.

Taanna politiit ukiumoortumik naatsorsuutaannut innersuussivoq. Taakkunani ikiaroornartut arsaarinnissutigineqartut assigiinngisitaariartornerat takuneqarsinnaavoq.

Aamma politiit tamanna erseqqissaatigaat.

- Kalaallit Nunaanni Politiit ikiaroornartunik sakkortuunik soorlu kokainimik, MDMA/ecstasynik amfetaminimillu Kalaallit Nunaanni arsaarinnissutigineqartartut ukiuni kingullerni ukiumoortumik nalunaarutini takusinnaavaat. Taama ineriartorneq ikiaroornartut taakku Kalaallit Nunaanni ikiaroornartuerniarnermi siammarnerusimanerannik takussutissaasinnaavoq, Kalaallit Nunaanni Politiit KNR-imut allapput.

Politiit ikiaroornartoq sakkortooq siorna arsaarinnissutigisaat 2024-mi kisitsisunut sanilliullugit minnerugaluartoq, amfetamini 30 grammip missaa, ecstasy iisartakkat qulit kokainilu 50 grammimiit oqimaannerulaartoq arsaarinnissutigineqarput.

2024-mi arsaarinnissutigineqartut qiviaraanni, 

Kokain 900 grammiuvoq, amfetamini 120 grammiulluni iisartakkallu ecstasyt 25-iullutik.

Arsaarinnissutigineqartut ukiumit ukiumut allanngorujussuarsinnaasartut, politiit erseqqissaatigaat. Qanorli iliartorumaarneranik ilimasuuteqarput.

- Ilaatigut ikiaroornartulerinerup ineriartornerata malitsigisaanik, ikiaroornartunik sakkortuunik Kalaallit Nunaannut siunissami eqqussuisoqarneruleriartornissaa Politiit ilimagaat, politiit allapput.

Ikiaroornartunik niuerneq niuernerit nalinginnaasut pisarnerisut pissuseqartoq, Efraim Jessen Olsen nassuiaavoq. 

- Tuniniaasoqarpoq noqqaasoqarlunilu, taanna oqarpoq.

Tassalu pinerluttuliortartut ikiaroornartunik tuniniaasinnaassappata, ikiaroornartut piumaneqaqqaartariaqarput. Piumasoqassasorlu nakorsatut siunnersortip ernummatigaa.

Atornerluisunngornissamut navianartorsiorneq

Inuit misigisaqarnerlunnermit kingunerlutsitsisut atornerluinermik ajornartorsiuteqalernissaminnut navianartorsiornerulertartut nunani tamalaani ilisimatusartut misissugaannik innersuussivoq. Allorfiup nammineq katsorsartakkaminnit misissuinerisa aamma tamanna takutippaat.

Nunarpullu kingunerluuteqarfiusorujussuusoq imminut toquttut nunatsinni amerlanerisa takutikkaa, Efraim Jessen Olsen isumaqarpoq.

- Kingunerluutit anneruppata, atornerluisunngornissaq ilimanaateqarnerulersartoq nalunngilarput. Tamannalumi imigassartornermut tunngasuni taavalu hashimik pujortartut pinerluttuliornerillu amerlanerinit takusinnaavarput. Taamaammat ikiaroornartut sakkortuut Kalaallit Nunaanni inuunernut sakkortuumik sunniuteqarsinnaanerannut annilaangangaatsiartoqarpoq, nakorsaq oqarpoq.

Nunatsinni ikiaroornartut sorliit, qanoq annertutigisut qaqugukkulu atorneqartarnerinut ilisimasat amigarput, ilanngullugu oqarpoq.

- Tuniniarneqartartut akoorneqartartut Danmarkimi Europamilu atornerluisut akornanniit ilisimavarput. Kokain immaqa morfiniminermik imaluunniit morfinimik assiliilluni sanaanik akoorneqartarput. Taamaammat suut atornerlugaanersut ilisimavinnginnatsigu ernumanarpoq.

Aamma ikiaroornartuerniat sunaqqissaaq tuniniarnerlugu soqutiginerpaajujuaannanngilaat.

- Ikiaroornartuerniat tuniniakkamik qanoq sakkortutigineri ilisimaqqissaanngilaat. Taava inuusuttup pisiani atoruniuk anersaartorunnaariasaarsinnaavoq.

- Danmarkimi, Europap kippasissuani USA-milu taamaattoqartartoq takussaavoq. Nunat tamalaani pissutsit Kalaallit Nunaanni atornerluiffinnut siunissami siaruaannissaat annilaanngatigaarput.

Tassungali suli killinngilagut.

Aamma nunatta anginera najugaqarfiillu siammasinnerat taamaattoqalernissaanut ilimanannginnerutitsipput.

- Qujanartumik inuiaqatigiiugatta avinngarusimasut politiit akitsuusersuisullu sakkussaqarunik eqqunniarneqartut tigusinnaavaat, ajornartorsiullu minnerpaaffissaminiitissinnaallugu.

Aamma politiit allapput, ineriartornermut malinnaallutik ikiaroornartunillu eqqussinernik siammarterinernillu killilersimaarinninnissamik ukkataqarlutik.

Akileraartarnermut aqutsisoqarfik ikiaroornartunik anngiorluni eqqussuinermut akiuinissamut ukiumut 5 milliuunit koruuninik 2025-miit qaavatigut aningasaliiffigineqartut, naalakkersuisut siorna allapput. 

Akitsuusersuisut eqqussuineq appartinniarlugu ilungersortut, allaqqavoq.

- Taamatut sulineq ingerlaavartumik nukittorsarneqarpoq, 2025-milu ukiunilu aggersuni suli nukittorsarneruneqassaaq, naalakkersuisut taamani allapput.

Eqqusuunneqannginnissaat suliassaq ataasiuvoq eqqunneqareertunilli atuinerup qanoq iliuseqarfiginissaa allaalluni.

Ikiaroornartut ilaasa ingammillu morfininut assingusut sunniutaannut ullumi nakorsaateqartoq Efraim Jessen Olsen erseqqissaavoq. 

- Allanulli, kokainimut, amfetaminimut assigisaanullu iliuuserisinnaasagut killeqarnerupput, nakorsaq oqarpoq.

Suut atorneqarnersut eqqakkat imerpalasut aqqutaanni uuttortaanikkut paasineqarsinnaasoq

Taamaammallu sutigut iliuuseqarnissap ilisimaarinissaa pingaartoq, taanna oqarpoq.

- Tamannalu pillugu arajutsinaveersaarnerusariaqartugut isumaqarpugut. Assersuutigalugu aqqunarsimasut nakorsiartarfianni nalunaarsuinerusarnikkut, eqqakkallu imerpalasut aqqutaasigut uuttortaasarnikkut.

Danmarkimi eqqakkat imerpalasut aqqutaanni uuttortaanernit kokainimik atuisoqarnerujartorneranik takutitsisumit misilittagaqarneq oqaluttuaraa.

- Assersuutigalugu illoqarfinni annerni Ilulissani, Sisimiuni Nuummilu eqqakkat imerpalasut aqqutaanni arfineq pingasuni quliniluunniit uuttortaasinnaagutta, taava atornerluiffinni suut atorneqarnersut malinnaaffiginerusinnaassavarput.

- Tamannalu aamma aqqunarsimasut nakorsiartarfiini arajutsisoqannginnissaanut iluaqutaassaaq. Taava aamma toraarnerusumik ikiuisalersinnaassaagut, Efraim Jessen Olsen oqarpoq.