Politiit pisortaat: Ikiaroornartut sakkortunerusut nunatsinni peqartartoq
Nunatsinni ikiaroornartut hashimit allaanerusut nassaassaapput.
Tamanna politiit ukiumoortumik nalunaarusiaanni qaammatip siuliani saqqummersumi allassimavoq.
Naak taakku annertunngikkaluartut, politiit pisortaata tamanna ajornartorsiutaaleriartortoq, Bjørn Tegner Bayip nalililerpaa.
- Nassaarineqartoq annertugisassaanngikkaluartoq, Ilisimatuussutsikkullu tunngavissaqanngikkaluarluta, taamaattorli ikiaroornartut hashimiit allaanerusut sakkortunerungaartullu nanisiarineqaleriartornerat malugisimavarput, politiit pisortaat Bjørn Tegner Bay oqarpoq, nangillunilu:
- Soorlu assersuutigalugu kokaini, ecstasy, amfetamini aammalu LSD.
Ajornartorsiutaasoq eqqumaffigineqarnerussasoq
Naallu ikiaroornartut sakkortuut immannguaannaq atuukkaluarpataluunniit, pigaluttuinnartoqannginnissaa pillugu pisortat akisussaasut tamatumunnga eqqumanerusariaqartut, politiit pisortaa kaammattuivoq.
AAMMA ATUARUK Politimesteri: Imigassamik atueriaaserput allanngortittariaqarparput
- Taamaattumik uagutsinnut pingaaruteqarpoq erseqqissassallugu susassaqartut soorlu uagut politiit, akitsuusiinermut nakkutilliisoqarfiit, napparsimaveqarfik, inunnik isumaginnittoqarfik, atuarfiit allallu, tassa inunnut ikiaroornartulerinermut attuumassuteqarsinnaasunut suliaqartartut tamatumunnga eqqumaqqissaarnissaat, tassami ajornartorsiutip qaffakkiartorpallaannginnerani aaqqinniarneqartariaqarmat, Politiit pisortaat Bjørn Tegner Bay oqarpoq.
Hashi suli annertusoq
Ikiaroornartunut tunngatillugu pinerliuuteqarnermi hashi suli suliani annerpaavoq.
Hashi 97,4 kiilu siorna arsaarinnissutigineqarpoq. Tamanna politiit ukiumoortumik nalunaarusiaanni allassimavoq.
Kisitsillu taanna ukiunut siuliinut tallimanut sanilliullugu qaffasinnerungaatsiarpoq, nalinginnaasumimmi ukiumut 64 kilo arsaarinnissutigineqartaraluarpoq.
