ICC professorilu: Nunap inoqqaavisa pisinnaatitaaffii periusissiami amigaataapput
Nunap inoqqaavisa pisinnaatitaaffii Naalakkersuisut uuliasiornermut periusissiaanni amigaataasut, ICC Ilisimatusarfimmilu professori isumaqarput.
Politikerilli nunap inoqqaavinit qinerneqaramik pisinnaatitaaffiit eqquutinneqarnissaat qulakkiissaqqaaraat, Naalakkersuisunit oqarput.
Inuilli assigiinngitsunik isumaqartut, professori oqarpoq, ICC-miillu Naalakkersuisut innuttaasunik tusaaniagaqannginnerarlugit isornartorsiorpaat.
Uuliasiornermut periusissiaq
- Naalakkersuisut 2020-mit 2024-mut uuliasiornermut periusissiaq ukioq nmanna jannuaarip naanerani akueraat.
- Nunatsinni uuliasiornerup soqutigineqaqqilernissaa periusissiami pingaarnertut aallunneqarpoq.
- Sumiiffinnik pisinnaatitsissuteqarfinnik nutaanik ammaaneq, nunami taamatullu sinerissap avataani.
- Nunap sannaanut aammalu geofysiskinut suliniutinik pisinnaatitsissutinut politikkimut akuusutut ilaatillugu ingerlatsinissaq.
- Uuliasiornermut suliffissuarnut iliuuseqarluni nittarsaassilluni suliniuteqarneq.
- Atugassarititaasunut killissaliussanik naleqqussaaneq, ilanngullugu ’first-mover’-nut aaqqissuussineq nutaaq, periusissiap atuuffissaani atuuttussaq, naapertorlugu akileraarusiisarnerup annertussusaanik immikkut naleqqussaanissaq.
- Naalakkersuisut siulittaasuata, Kim Kielsenip, nunatsinni sumiiffiit pillugit akuersissutit nutaat saqqummiunneqartut sapaatit akunneranni 6-imi Houstonimi ussassaarutigiartorpai.
- Tamatuma kingorna Namminersorlutik Oqartussanit atorfilittat Londonimut februarip ulluisa qulinganni nittarsaassiartorput.
Paasissutissat: Naalakkersuisut
- Taanna uggornartorujussuartut taasariaqarpoq, pissutigalugu soorunami taama annertutigisumik pilersaaruteqartoqarpat, taava qanittumi najugaqartut avatangiisillu sunnerneqarsinnaanerat qanittuararsuuvoq, Kalaallit Nunaanni ICC-p siulittaasua, Hjalmar Dahl, oqarpoq.
AAMMA ATUARUK Uulia gassilu eqqasuuteqarnarput
Nunap inoqqaavisa ilaatigut "kiffaanngissuseqartumik, sioqqutsisumik aamma paasinnittumik akuersisinnaatitaaneq" pisinnaatitaaffigaat.
Nukissiuuteqarnermulli naalakkersuisup, Jess Svanep, isornartorsiuineq pissutissaqarsorinngilaa.
- Nunatsinni suliniaqatigiiffiit assigiinngitsut tusarniaavigineqarput. Aamma ICC ilanngullugu tusarniarneqarpoq. Taamaammat isumaqanngilanga nunap inui saneqqutaarneqarlutik periusissiamik sanasoqartoq, Jess Svane oqarpoq.
AAMMA ATUARUK Misissuineq: Innuttaasut uuliasiorneq pillugu pitsaanerusumik ilisimatinneqarusupput
Taassuma ilanngullugu oqaatigaa, politikerit nunap inoqqaavinit qinerneqarmata, Naalakkersuisut Inatsisartullu suliami pingaarnerpaajusut.
Innuttaasulli aatsitassarsiornermut isumaat assigiinngitsorujussuusut Ilisimatusarfimmi professori Anne Merrild Hansen, issittumi avatangiisit pillugit nalilersuinermik suliaqartoq oqarpoq.
- Taavalu uuliamut gassimullu tunngatillugu, innuttaasut siunissaannut suna anguniagaanersoq, ilaquttaminnullu qanoq kissaateqarnersut aallaavigalugit isummersortarput, Anne Merrild Hansen oqarpoq.
Aamma inuiaqatigiinnut sunniutaasinnaasunik nalilersuineq periusissiami amigaataasut, professorip ilanngullugu oqaatigaa.
AAMMA ATUARUK Professori uulia pillugu: Sunniuteqarujussuartartoq nunarsuarmi tamani misilittakkat takutippaat
Naalakkersuisut nunami uuliasiornissaq periusissiaminni periarfissaatippaat. Taamaalilluni uuliasiortut innuttaasunut qaninnerulissasut, professori oqarpoq.
Innuttaasullu ingammik uuliamik qalluineq taakkununnga avatangiisaannullu kinguneqartupilussuusinnaatillugu tusarneqartariaqartut, Hjalmar Dahl isumaqarpoq.
- Issittoq takuinnaraanni sikorsuaqartarnera, iluliaqartarnera, sarfaqartarnera ilaalu ilanngullugit eqqarsaatigalugit innarliisinnaanera tamanut tussaaq, Hjalmar Dahl oqarpoq.
AAMMA ATUARUK Issittumi uuliaqarluartoq ilimagineqarpoq
ICC-p uuliamut periusissiaq pillugu tusarniaanermut akissutimini ernumassutini aamma allattorpai. Illuatungeriinnilli isumaqartoqartillugu tamat naammaginnissinnaanngitsut, Jess Svane oqarpoq.
- Suliffeqarfiit susassaqartut aamma innuttaasunut sinniisuusut, ilaatigut aamma ICC, taakkulu oqaaseqaataat tiguneqarput, aamma periusissiap suliarineqarnerani soorunami tamakku tamarmik suliarineqarput, Jess Svane oqarpoq.
Naalakkersuisut isumannaassuseq avatangiisillu pingaartikkaat ilanngullugu oqarpoq. Uuliamillu qalluinissamut saaffiginnittoqassappat, avatangiisinut inuiaqatigiinnullu sunniutaasinnaasut VVM-imi VSB-nilu naliliiffigineqarumaartut oqaatigaa.